Ֆրանսիայի մշակույթի նախարարի մոտ հաստատվել է կորոնավիրուսի առկայությունը

Ֆրանսիայի մշակույթի նախարար Ֆրանկ Ռիստերը վարակվել է COVID-19 նոր կորոնավիրուսով. գրում է  France Presse-ը` նախարարի գրասենյակի հայտարարությանը հղումով. հայտնում է Yerkir.am-ը:

«Նախարարի թեստերն այսօր դրական արդյունք են ցույց տվել»,-պարզաբանում է գործակալությունը` շեշտելով, որ նախարարն այս պահին գտնվում է Փարիզի իր տանն ու իրեն լավ է զգում:

Նշվում է՝ Ռիստերը անցյալ շաբաթ մի քանի օր անցկացրել էր Ազգային ժողովում, որտեղ վերջին տվյալներով կորոնավիրուս է հայտնաբերվել հինգ պատգամավորի մոտ:

Ըստ երկրի առողջապահության գլխավոր տնօրենության ղեկավար Ժերոմ Սալոմոնի խոսքերի՝ Ֆրանսիայում կորոնավիրուսով վարակվել է 1.412 մարդ, որից 25-ը մահով է ավարտվել:

Yerkir.am-ն ավելի վաղ տեղեկացրել էր, որ չինական Ուհան քաղաքում բռնկված ու ողջ աշխարհում տարածում գտնող անհայտ տիպի կորոնավիրուսով վարակվածների թիվն օր օրի աճում է։ Կորոնավիրուսի բռնկման մասին չինական իշխանությունները ԱՀԿ-ին տեղյակ էին պահել  դեռևս դեկտեմբերին:

Մարտի 10-ի ժամը 09.33-ի դրությամբ ողջ աշխարհում հաստատվել է կորոնավիրուսով վարակման 114.448 դեպք, որից 4026-ը՝ մահվան, և 64.156-ը՝ առողջացման:

Հիշեցնենք՝ Եվրոպայում ավելի քան 9000 հայտաբերված վարակակիր կա, որից 2/3-ը բաժին է ընկնում Իտալիային, վարակման ավելի քան 700-ական դեպքեր են գրանցվել Ֆրանսիայում և Գերմանիայում։ Առաջին անգամ կորոնավիրուս է հայտնաբերվել նաև Մոլդովայում։

Հայաստանում այս պահին կորոնավիրուսի հաստատված 1 դեպք կա: Տղամարդը Երևան էր ժամանել Թեհրանից: Այս պահին նա և օդանավում եղած մնացյալ 30 անձինք գտնվում են կարանտինում՝ Ծաղկաձորի «Գոլդեն Փելիս» հյուրանոցային համալիրում: Նրանք իրենց լավ են զգում: