Թուրքիայում երկրաշարժի զոհերի թիվը հասել է 39-ի. իշխանությունները մերժում են քրդական կուսակցության օգնությունը

Թուրքիայի Էլազըղ (պտմ. Խարբերդ) նահանգի Սիվրիջե քաղաքում 6.8 բալ ուժգնությամբ տեղի ունեցած երկրաշարժի հետևանքով զոհերի թիվը հասել է 39-ի, մոտ 1500 մարդ վիրավորվել է, որոնցից 128-ը գտնվում են բժիշկների խիստ վերահսկողության ներքո:

Շարունակվող որոնողական աշխատանքների հետևանքով փլատակների տակից դուրս է բերվել մոտ 50 քաղաքացի:

Աղետների և արտակարգ իրավիճակների վարչության տարածած հայտարարության մեջ նշվում է, որ Էլազըղում և Մալաթիայում ուսումնասիրվող 2945 շինությունից 1521-ից 84-ը փլուզվել է, 1287 մեծ վնաս է կրել. ըստ Yerkir.am-ի՝ հայտնում է gazeteduvar.com.tr կայքը:

Թուրքական աղբյուրները նաև հայտնում են, որ երկրի իշխանությունները չեն թույլատրում ընդդիմադիր քրդական Ժողովուրդների դեմոկրատական կուսակցությանը օգնություն ցուցաբերել և ուղարկված հացահատիկը, մանկական սնունդը, մի շարք առաջին անհրաժեշտության մթերային և կենցաղային ապրանքները հետ են ուղարկվում: