«Девочка стоп!». հայ հեղինակի երգը պատվիրելու համար Վրաստանում Ադրբեջանի ռազմական կցորդը ծեծկռտուք է սարքել

Թբիլիսիում գործող ադրբեջանական «Գաբալա» ռեստորանում նախօրեին ծեծկռտուք է տեղի ունեցել: Ռեստորանի հաճախորդ, Վրաստանում Ադրբեջանի դեսպանատան ռազմական կցորդ Վուգար Մամեդովին դուր չի եկել, որ երգիչները կատարել են հայ հեղինակի ռուսերեն երգը. ըստ Yerkir.am-ի՝ հայտնում է Aliq.ge կայքը:

«Ալիք Մեդիայի» հետ զրույցում երգիչ Աֆիք Նովրուզովը նշեց, որ տվյալ ռեստորանում սովորաբար տարբեր ազգությունների ներկայացուցիչներ են հյուրընկալվում, այս անգամ էլ հյուրերից մեկը պատվիրել է ազգությամբ հայ Արսեն Շախունցի հեղինակած «Девочка стоп!» հայտնի երգը:

Դիվանագետը նախ վիրավորանքներ է հասցրել երգիչներին, ինչից հետո ծեծի է ենթարկել նրանց: Դեպքի վայր ժամանած ոստիկանությունը չի կարողացել բերման ենթարկել ադրբեջանցի հաճախորդին, քանի որ վերջինս դիվանագիտական անձեռնմխելիություն ունի:

Ռեստորանի ազգությամբ ադրբեջանցի երգիչներն ասում են՝ դեսպանի հետ մոտ հարաբերություններ ունեն, այսօր էլ հանդիպել են նրան՝ բարձրաձայնելու դիվանագետի ոչ պատշաճ պահվածքը: Երգիչների խոսքով, դեսպանը ևս համակարծիք է նրանց հետ: Նրանց հիմնական պահանջն է աշխատանքից ազատել ու վտարել երկրից դիվանագետին: