Հաշմանդամների ուսման զեղչի փոխարեն վարչապետի ձեռագրի գովազդ․ ընդդիմադիր պատգամավորները տարակուսած են

Ամանորյա այդ չափի ծախսերին ԲՀԿ խմբակցությունը կտրականապես դեմ է եղել ՝ Yerkir.am-ին ասաց ՀՀ ԱԺ ԲՀԿ խմբակցության պատգամավոր Արման Աբովյանը։

«Տոնն իհարկե, կարելի է նշել, բայց  ոչ այդ աստիճանի: Եթե բյուջեում գումար չկա և ստիպված ենք նոր վարկեր վերցնել, ինչո՞ւ է մեկ միլիոն դոլարից ավելի ծախսվում Ամանորի համար»,-տարակուսեց նա:

Խոսքը պետական վերջին վարկային պայմանագրերի մասին է։ ՀՀ ԱԺ ԼՀԿ խմբակցության պատգամավոր Գևորգ Գորգիսյանը Yerkir․am-ին ասաց, որ շոշափելի և անշոշափելի ոչ մի առաջընթաց դրանք չտվեցին, բայց բյուջեի վրա ծանր բեռ դարձան։

«Մեր համակարգային փոփոխությունների համար գումար չկար, բայց Փաշինյանի ստորագրությունն ամբողջ երկրով գովազդվեց, պետության հաշվին ինչ-որ գորգեր լվացվեցին, քաղաքացու տոն նշվեց և այլն: Ի տարբերություն մեր առաջարկների, սրանք ոչինչ չտվող ծախսեր են»,-ասաց Գորգիսյանը:

Արման Աբովյանի դիտարկմամբ՝ կառավարության վարկային պայմանագրերը չարդարացված ու անհիմն են։

«Մենք դեմ ենք քվեարկել այդ որոշմանը, որովհետև դեմ ենք անընդհատ կրկնվող վարկային պատմություններին, մանավանդ, երբ բացատրություն չկա՝ ինչին է ծառայելու այդ գումարը»:

Գորգիսյանը համաձայն է՝ այդ վարկային պայմանագրերը, տոկոսադրույքի ու ժամկետի առումով, աննախադեպ են, բայց դա քիչ է դրանք ողջունելու համար.

«Մեզ համար անընդունելի ու անհասկանալի էր, որ այդ գործարքը բերվել է տարվա վերջ՝ արտահերթ ռեժիմով, երբ դա  2019թ. բյուջեով նախատեսված վարկ է։ Զարմանալի էր նաև՝ ինչու է տարվա համար նախատեսված վարկը հաստատվում,  երբ տարվա ավարտին մնացել է 18 օր: Չէ՞ որ արդեն տարվա բոլոր ծախսերն արված են, այս պարագայում այդ վարկառությունն անհիմն էր, ու՞ր են գնալու այդ գումարները»:

Ամանորին հատկացված գումարը ԼՀԿ-ի տեսանկյունից ևս քննադատելի է։ Այն մի քանի անգամ գերազանցում է նախորդ տարիներին արված ծախսերը։

«Մենք ունեինք տարբեր նախագծեր, որոնք կառավարությունը հավանության չարժանացրեց՝ պատճառաբանելով, որ գումար չկա: Բայց մենք առաջարկում էինք, օրինակ, երրորդ կարգի հաշմանդամների համար ուսման զեղչ, բանակից զորացրվածներին բժշկական հետազոտություն ու համապատասխան բուժում: Այսպիսի առաջարկները մերժվեցին ու հաստատվեցին վարչապետի ստորագրությունների ու բարեմաղթանքների գովազդային արշավները, որոնք հսկայական գումարներ դուրս բերեցին պետական բյուջեից»,-ասաց Գևորգ Գորգիսյանը:

Գևորգ Գյուլումյան