Հայոց պատմությունը լավ սովորողը ֆիզիկան էլ է լավ սովորում և հակառակը. պատմաբան Աշոտ Հայրունի

Հայոց լեզու, հայ գրականություն, հայոց պատմություն առարկաները բուհերում ընտրովի դարձնելու՝ ԿԳՄՍ նախարարի մտահղացումը հատկապես գիտական ոլորտում շարունակում է ընդվզման ալիք բարձրացնել: Yerkir.am-ի հաղորդմամբ՝ մտավորականները վերլուծում են իրավիճակը, անդրադառնում կրթական խնդիրներին, խոստովանում, որ դրանք, այո, կան, բայց նաև հակադարձում են՝  բուն խնդիրները թողած՝ չի կարելի հայագիտական առարկաները հալածանքի ենթարկել:

   Պատմական գիտությունների դոկտոր, պրոֆեսոր, թարգմանիչ, բանասեր, գերմաներենի մասնագետ Աշոտ Հայրունին արևմտյան գիտնականներին է վկայակոչում. նրանք հիացել են հայ ընտանիքով, հայ մարդու՝ իր արժեհամակարգին հավատարիմ մնալու սկզբունքներով: Յուրաքանչյուր ազգ, յուրաքանչյուր ժողովուրդ իր գոյաբանության առանձնահատկություններն ունի և ինչ-որ մի աշխարհաքաղաքական թեզ պատճենելը   բացասաբար կանդրադառնա մեզ վրա:

   Պատմաբանը հետադարձ հայացքով ամփոփում է մեր անցյալը: Մեր պատմության հազարամյակներում   անհամեմատ ծանր իրավիճակներում կռվել ու հաղթել ենք: Միշտ հաղթել ենք, երբ համախմբվել ենք և հույսը մեզ վրա ենք դրել: Պարտվել ենք միայն այն ժամանակ, երբ համախմբված չենք եղել կամ մեր հույսը մեզ վրա չենք դրել: Իսկ համախմբումը հնարավոր է եղել միմիայն  արժեհամակարգի հիմքի վրա: Համախմբվել ենք մեր լեզվի, մեր հոգևոր արժեքների, կրոնի, մշակույթի հիմքի վրա, և այդ համախմբումը մեզ հաղթանակի է տարել:

«Բավական է, որ մենք  դադարենք համախմբվել, իսկ դա հնարավոր կլինի միայն  արժեհամակարգի խաթարման դեպքում, և  մենք կսկսենք մեր նոր պարտությունների շղթան: Պարտությունները կարող են անդառնալի հետևանքների հասցնել»,- նկատում է գիտնականը:

Հայագիտական առարկաները բուհերից դուրս մղելը նա չհամախմբման, ուրեմն և պարտության նախադրյալ է համարում:   

«Հայոց լեզու, հայ գրականություն, հայոց պատմություն առարկաների ոչ պարտադիր լինելու մեջ ես տեսնում եմ հակառակ մի գործընթաց, որը նորոգման կարիք ունի: Համակարգի  նորոգման ընթացքում մենք կարևոր  տախտակները հանում-շպրտում ենք դուրս: Մենք պետք է կարևորենք մեր ազգային արժեհամակարգը: Մեր հասարակության մեջ առկա բոլոր հիվանդությունները, ընտանեական բռնությունները կվերանան, եթե  մեր ազգային արժեհամակարգին դավանենք: Անգամ կոռուպցիան կվերանա»,-վստահ է պրոֆեսորը:

Ազգային արժեհամակարգի զորեղությունը նա ամենուր է  հաստատում: Մարդուն մաքրագործում է, նրան հոգեպես և բարոյապես հարստացնում է  ազգային արժեհամակարգը: Հասարակությունը նույնպես մաքրագործվում է ազգային արժեհամակարգով:

«Տարբեր ֆակուլտետներում  հետևյալ   օրինաչափությունն է միշտ եղել՝ ֆիզիկոս, քիմիկոս, թե մաթեմատիկոս,  իմ ուսանողները գերազանց սովորել են հայոց պատմությունը՝ միաժամանակ գերազանց սովորելով նաև մասնագիտական առարկաները: Նրանք, ովքեր վատ էին սովորում հայոց պատմությունը, վատ էին սովորում նաև մասնագիտական առարկաները: Այսինքն՝ մենք ժամաքանակ, առարկաներ տեղափոխելու խնդիր չունենք, կրթական համակարգը բարեփոխելու խնդիր ունեք: Բուհական համակարգում  մասնագիտական պահանջմունքներին համապատասխան է կրթությունը տարվում: Իսկ եթե այն  դեռևս լավ չի ծրագրված, ապա թող ծրագրվի, բարեփոխվի: Ֆիզիկան լավ սովորող ուսանողին ամենևին չի խանգարում հայոց պատմությունը, որը նա ևս կարող է լավ սովորել: Մենք խնդիր ենք փնտրում այնտեղ, որտեղ չկա այդ խնդիրը: Իսկ իրական խնդիրները դեռևս չենք տեսնում»,- ասում է երկարամյա դասախոսը: