Լավրովի հետ հանդիպման ժամանակ Թրամփը Ռուսաստանին նախազգուշացրել է չմիջամտել ԱՄՆ ընտրություններին

ԱՄՆ նախագահ Դոնալդ Թրամփը Ռուսաստանի ԱԳՆ ղեկավար Սերգեյ Լավրովի հետ հանդիպման ընթացքում նախազգուշացրել է չմիջամտել ամերիկյան ընտրություններին և հորդորել Մոսկվային կարգավորել հակամարտությունն Ուկրաինայի հետ. ըստ Yerkir.am-ի՝ հայտնում է ՏԱՍՍ-ը՝ Սպիտակ տան մամուլի ծառայության տարածած հաղորդագրությանը հղումով:

«ԱՄՆ նախագահ Դոնալդ Թամփը հանդիպել է Ռուսաստանի արտաքին գործերի նախարար Սերգեյ Լավրովի եւ ԱՄՆ պետքարտուղար Մայքլ Պոմպեոյի հետ։ Լավրովը տեղեկացրել է նախագահ Թրամփին երկկողմ հարաբերությունների վիճակի վերաբերյալ իր քննարկումների մասին,- նշվում է տեքստում ու հավելվում. «Նախագահ Թրամփը նախազգուշացրել է Ռուսաստանի ցանկացած միջամտությունից ամերիկյան ընտրություններին եւ կոչ է արել Ռուսաստանին կարգավորել հակամարտությունն Ուկրաինայի հետ»։

Հիշեցնենք, որ Լավրովը մամուլի ասուլիսում տեղեկացրել էր նաև, որ առաջարկել է ԱՄՆ նախագահին հրապարակել Մոսկվայի եւ Վաշինգտոնի նամակագրությունը ընտրություններին ՌԴ-ին վերագրվող «միջամտության» մասին։

Առեւտրի բարելավում

Թրամփը Լավրովի հետ հանդիպման ժամանակ ասել է, որ երկկողմ հարաբերությունների բարելավումը թույլ կտա ակտիվացնել փոխադարձ առեւտուրը։

«Կողմերը դիտարկել են Չինաստանի հետ հարաբերությունների վիճակը։ Նախագահը նշել է, որ Ռուսաստանի հետ հարաբերությունների բարելավումը թույլ կտա բարելավել երկկողմ առեւտուրը»,- հայտնել է Սպիտակ տան մամուլի ծառայությունը։

Ավելի վաղ One America News Network հեռուստաալիքի հարցազրույցում ԱՄՆ պետքարտուղար Մայքլ Պոմպեոն մանրամասնել էր, Թրամփը հանձնարարել է աշխատել Ռուսաստանի հետ բիզնեսի ոլորտում։ «Ոլորտներից մեկը, որում նախագահը խնդրել է աշխատել միասին, բիզնես-համագործակցությունն է։ Կփորձենք աշխատել այդ (ոլորտում)»,- ասել է Պոմպեոն։

Կալանավորված քաղաքացիների վերաբերյալ իրավիճակը

ԱՄՆ նախագահը Ռուսաստանի արտաքին գործերի նախարարի հետ քննարկել է նաեւ այն հարցը, թե ինչպես կարելի է բարելավել երկու երկրների կալանավորված քաղաքացիների հետ կապված իրավիճակը։

«Նախագահը ողջունել է Ռուսաստանի հետ համագործակցության շարունակումը այն հարցերի լուծման ուղղությամբ, որոնք փոխադարձ մտահոգիչ են, ներառյալ այն, թե ինչպես ԱՄՆ-ը եւ Ռուսաստանը կարող են դրական քայլեր կատարել կալանավորված քաղաքացիների առումով»,- նշվում է հաղորդագրությունում: 

Նախօրեին Լավրովը հայտարարել էր, որ ՌԴ-ում լրտեսության մեջ մեղադրվող ամերիկացի Փոլ Ուիլանը իրեն հանդուգն է պահում եւ սպառնում է Պատիժների կատարման դաշնային ծառայության (ՊԿԴԾ) աշխատակիցներին։