Ստոլտենբերգը նախազգուշացրել է Ռուսաստանին միջուկային զենքի կիրառման մասին

Ուկրաինայում Ռուսաստանի կողմից միջուկային զենքի կիրառումը մասշտաբային հետևանքներ կունենա. ՆԱՏՕ-ի կենտրոնակայանում լրագրողներին ասել է ՆԱՏՕ-ի գլխավոր քարտուղար Իենս Ստոլտենբերգը դաշինքի գագաթնաժողովից առաջ, որը տեղի կունենա հինգշաբթի օրը՝ մարտի 24-ին։

Ըստ նրա՝ միջուկային զենքի կիրառումը կփոխի պատերազմի բնույթը։ Դաշինքի ղեկավարը Մոսկվային «մեսիջ» է ուղարկել՝ նշելով, որ «Ռուսաստանի Դաշնությունը չի կարողանա հաղթել միջուկային պատերազմում»։

Ստոլտենբերգը նշել է, որ ՆԱՏՕ-ն պատասխանատվություն է կրում, որ պատերազմը չտարածվի Ուկրաինայի սահմաններից դուրս։

Միաժամանակ, նա ընդգծել է, որ ՆԱՏՕ-ն դեմ է Ուկրաինայի վրա ոչ թռիչքային գոտու ստեղծմանը։ Ըստ Սթոլթենբերգի՝ դա կհանգեցնի ՆԱՏՕ-ի հետ լայնածավալ պատերազմի։

Հյուսիսատլանտյան դաշինքի ղեկավարը նշել է, որ վաղվա գագաթնաժողովում քննարկվելու է Չինաստանի դերը ուկրաինական ճգնաժամում։ Դաշնակիցները վախենում են, որ «Չինաստանը կարող է նյութական աջակցություն ցուցաբերել Ռուսաստանին ներխուժման համար»,- ասել է նա:

Ստոլտենբերգը նաև աջակցություն է խոստացել Մոլդովային, Վրաստանին և Բոսնիա և Հերցեգովինային։