ՀՅԴ ՀԵՄ նախաձեռնած ցույցին միացան նաև ԵՊՀ ուսանողները

Կառավարության դիմաց այսօր` նոյեմբերի 7-ին ԿԳՄՍ նախարար Արայիկ Հարությունյանի հրաժարականն են պահանջում  ՀՅԴ ՀԵՄ անդամները, որոնց միացել են նաև ԵՊՀ ուսանողներ:

Արայիկ Հարությունյանի հրաժարականը պահանջող ԵՊՀ ուսանող Սեդա Մակարյանը վստահ է, որ առանց նախարարի թույլտվության, առանց իր որոշման նախարարությունում ոչինչ չի կարող ընդունվել. «Նախարարը գլխավոր պատասխանատուն է այն ամենի, ինչն առաջացրել է մեր  դժգոհությունը: Որպես ՀՀ քաղաքացի,  որպես ԵՊՀ  ուսանող ես պահանջում եմ ԿԳՄՍ նախարար Արայիկ Հարությունյանի հրաժարականը, ինքն անցել է բոլոր սահմանները: Ֆինանսավորում է ապազգային ֆիլմեր` տրանսգենդերների մասին: Մեր պահանջն իր հրաժարականն է, մենք չենք ուզում, որ մեր վճարած հարկերից հատկացվեն գումարներ նման ֆիլմերի համար»  Yerkir.am-ի հետ զրույցում իր դժգոհությունը ներկայացրեց ԵՊՀ ուսանողը:

ՀՅԴ անդամ Ժենիկ Պարսամյանը պատասխանելով Yerkir.am-ի հարցին, թե ինչու՞ է պահանջում նախարարի հրաժարականը` մասնավորապես նշեց` «Ես ինքս դպրոցի տնօրեն եմ եղել Իրանում , ինչպես նաև հայոց լեզու, հայ գրականություն եմ դասավանդել: Մեր նպատակն այն է եղել, որ հայոց լեզուն, հայ գրականությունն ու հայոց պատմությունը փոխանցենք մեր սերունդներին, մեր հայացքն ուղղենք դեպի հայրենիք` Հայաստան: Վերջին 15 տարին այստեղ եմ ապրում, իսկ այստեղ ի՞նչ են անում` ոչ պարտադիր են դարձնում նշված առարկանները: Մեր ազգայինը պարտադիր պետք է պահպանվի»:

Հիշեցնենք, որ ՀՅԴ Հայաստանի Երիտասարդական միությունը հինգշաբթի օրվանից սկսած բողոքի ակցիաներ է իրականացնում ԿԳՄՍ նախարար Արայիկ Հարությունյանի հրաժարականի պահանջով: Ավելի ուշ նրանք բողոքի ակցիա էին իրականացրել նաև ԿԳՄՍ նախարարության շենքում:

Նարա Մարտիրոսյան