Թուրքերի 76 տոկոսը կողմ է Թուրքիայի ռազմական գործողություններին

«Areda Survey» հետազոտական կենտրոնը հարցում է անցկացրել՝ պարզելու համար Թուրքիայի զինված ուժերի կողմից հոկտեմբերի 9-ին սկսված «Խաղաղության ակունք» ռազմական գործողության նկատմամբ թուրքերի դիրքորոշումը:

Ըստ հարցումների՝ բնակչության 76 տոկոսը դրական է վերաբերվում թուրքական ագրեսիային, իսկ 77.2 տոկոսն էլ վստահ է, որ ռազմական գործողությունը հաջող ավարտ է ունենալու. հայտնում է Yeni Şafak թերթը:

Հարցմանը մասնակցել է 2160 մարդ, որոնցից 73.3 տոկոսն այդ գործողությունները համարում է ոչ թե «պատերազմ», այլ «ահաբեկչության դեմ պայքար»: 74.5 տոկոսը նշում է, որ գործողությունն ապահովելու է երկրի ներքին անվտանգությունը, 67.9-ի կարծիքով՝ թիրախը Քուրդիստանի աշխատավորական կուսակցությունն է, 20.3 տոկոսի կարծիքով էլ՝ ԱՄՆ-ը:

«Անհրաժեշտության դեպքում կմիանա՞ք գործողությանը» հարցին ի պատասխան՝ թուրքերի 77.8 տոկոսը միանալու պատրաստակամություն է հայտնել: