ՈՒԵՖԱ-ն կքննարկի Թուրքիայում Չեմպիոնների լիգայի եզրափակիչի անցկացման որոշումը

ՈւԵՖԱ-ի փոխնախագահ Միշել Ուվան հայտնել է, որ կազմակերպությունը կքննարկի 2019/2020 թթ. ՈւԵՖԱ-ի Չեմպիոնների լիգայի եզրափակիչի՝ Ստամբուլում անցկացվելու որոշումը: Մի շարք մասնագետներ և երկրպագուներ կոչ էին արել կազմակերպությանը՝ չեղարկել Թուրքիայում այն անցկացնելու որոշումը՝ կապված Անկարայի կողմից Սիրիայի հյուսիսում ռազմական գործողության վերսկսման հետ: Բացի այդ՝ մարդկանց վրդովմունքն էր առաջացրել նաև այն, որ թուրք ֆուտբոլիստները գոլ խփելու ժամանակ զինվորական ողջույնի ժեստ էին անում՝ ի պաշտպանություն իրենց երկրի:

«Մենք կաշխատենք մեր լիազորությունների շրջանակում՝ հարգելով սպորտի անկախությունն ու ինքնավարությունը քաղաքականությունից: Բայց,  իհարկե, մենք չենք կարող փոխարինել ՄԱԿ-ին, ԵԽ-ին կամ ԱՄՆ-ին, տարբեր դիվանագետների և քաղաքական գործիչների»,- հաղորդում է Championat.com կայքը՝ մեջբերելով Ուվային:

Նշենք, որ իտալացի և ֆրանսիացի պաշտոնյաներն արդեն դիմել են ՈւԵՖԱ-ին նման կոչով: Իսկ օրեր առաջ Ֆրանսիայում տեղի ունեցած՝ Ֆրանսիա-Թուրքիա ֆուտբոլային հանդիպումից առաջ Ֆրանսիայի ԱԳՆ ղեկավար Ժան  Իվ լե Դրիանը բոյկոտել էր այդ հանդիպումը՝ հայտարարելով, որ չի այցելի խաղադաշտ թուրք ֆուտբոլիստների ժեստի պատճառով: