Գործադիրը ևս 12 հազար դոլար հատկացրեց Հուրգադայից ՀՀ քաղաքացիներին տեղափոխելու համար

Կառավարության այսօրվա նիստում որոշվեց Եգիպտոսում գտնվող քաղաքացիների Հայաստան տեղափոխման ծառա­յությունների  իրականացման համար Հայաստանի Հանրապետության 2019 թվականի պետական բյուջեով նախատեսված  Հայաստանի Հանրապետության կառավարության պահուստային ֆոնդի հաշվից  Հայաստանի Հանրապետության տարածքային կառավարման և ենթակառուցվածքների նախարարությանը ինն ամսում հատկացնել 5,838.6 հազ. դրամ: 

Հարցը ներկայացրեց տարածքային կառավարման եւ ենթակառուցվածքների նախարար Սուրեն Պապիկյանը:

ՀՀ կառավարության որոշման նախագծի ընդունումը  պայմանավորված է Հուրգադա-Երևան ևս մեկ չվերթ կազմակերպելու անհրաժեշտությամբ, այս կապակցությամբ պայմանավորվածություն է ձեռք բերվել «Տարոն-Ավիա» ՍՊԸ-ի հետ օգոստոսին չվերթ իրականացնելու վերաբերյալ:

Որոշման նախագծով նախատեսվում է  «Տարոն-Ավիա» ՍՊԸ-ին ՀՀ 2019 թվականի պետական բյուջեից հատկացնել 12 000 ԱՄՆ դոլար` 5,838.6 հազ դրամ: