Իշխանական խմբակցության պատգամավորները ընդդիմադիր խմբակցություններին կոչ են անում քվեարկել հօգուտ համահարթեցման

Հարկային փոփոխությունների քննարկման ընթացքում ԱԺ ամբիոնից իշխանական խմբակցության պատգամավորներն իրենց փաստարկները համեմում են դասականներից մեջբերումներով` համոզելու համար, թե ինչու է առաջարկվող նոր հարկային օրենսգիրքն ավելի լավը:

 «Իմ քայլը» խմբակցության պատգամավոր Բաբկեն Թունյանը, դիմելով ընդդիմադիր պատգամավորներին, որոնք հայտարարեցին, որ դեմ են քվեարկելու, ասաց.  «Մենք ասում ենք՝ եկեք մի քայլ առաջ անենք, հետո գլոբալ փոփոխությունների կգանք: Դուք ասում եք` չէ, քանի որ սա թռիչքային աճ չի ապահովում, մենք դեմ ենք: Պատկերացրեք՝ դեմ եք քվեարկում, իսկ «Իմ քայլի» ձայներն էլ չեն բավարարում, և նախագիծը չի ընդունվում, հետո ի՞նչ է տեղի ունենալու: Հեռանկարը պատկերացրեք՝ պարզ կլինի: Եթե վատն է, ինչո՞ւ են գործարարները սպասում սրա ընդունվելուն»:

Թունյանին տարօրինակ է թվում, թե շատ ինտենսիվ քննարկված հարցին ինչո՞ են ընդդիմադիր խմբակցությունները դեմ քվեարկելու:  «Լիքը դրույթներ կան, որ միասին ենք արել։ Ուզում եմ ասել՝ եկեք դետալներից վերանանք, ավելի գլոբալ նայենք: Դուք այս օրենսգրքի դրական փոփոխությունների մեջ մեծ մաս ունենք ու դեմ կքվեարկեք: Մենք կասենք՝ միշտ շնորհակալ ենք ձեր աշխատանքի, քննադատությունների համար և առաջիկայում կունենանք, իրոք, նոր հարկային օրենսգիրք, որը կլինի մտածված, աշխատված ու թռիչքային աճ ապահովող: Այսօրվանը մի քանի քայլ առաջ է, դրա համար էլ կոչ եմ անում կողմ քվեարկել»,- ասաց նա։

Իմքայլական Գոռ Գևորգյանը ելույթի սկզբում մեջբերեց ռուս հրապարակախոս Չաադաևի խոսքերը՝ ես գերադասում եմ մտրակել, անգամ` տխրեցնել, բայց երբևէ չփորձել խաբել իմ պետությանը, չխաբել իմ հայրենիքին։ Նա փորձեց  փաստարկել, թե  ինչու ներկայում գործող պրոգրեսիվ հարկումը չի արդարացնում իրեն։ Ըստ նրա՝ այդպիսի հարկումն ավելի վատ պայմաններ է ստեղծում ավելի բարձր արտադրողականություն ունեցող աշխատողների համար, այդպիսով` հարկվում է աշխատավարձը, ոչ թե եկամուտը։

Նա ավարտեց ելույթը Էյնշտեյնի խոսքերով՝ «Երջանկության բանաձևը՝ եթե կա կամք, ապա կա նաև միջոց»։