Վերին Լարսի անցակետը բաց է, կուտակումներ չկան

Հյուսիսային Օսիայի իրավապահ մարմինները Sputnik լրատվական գործակալության վրացական ծառայության հետ զրույցում հերքել ենտեղեկություններն առ այն, որ Վերին Լարսի անցակետում ռուսական կողմը մեքենաներին թույլ չի տալիս շարժվել դեպի Վրաստան:

Նման տեղեկություններն ակտիվորեն շրջանառվում են սոցցանցերի վրացական հատվածում:

«Մենք աշխատում ենք բնականոն ռեժիմով: Բոլոր ուղղություններն աշխատում են, հերթեր չկան: Կուտակվում է առավելագույնը 20-30 մեքենա, որոնք սպասում են տասը րոպե»,- ասել է Դաշնային մաքսային ծառայության Հյուսիսօսական մաքսային վարչության մամուլի ծառայության աշխատակիցը:

Նա ընդգծել է, որ սահմանապահները մարդկանց չեն համոզում հրաժարվել Վրաստան գնալուց, քանի որ դա նրանց իրավունքն է:

«Մենք պարզապես նախազգուշացնում ենք նրանց, որ ՌԴ նախագահ Վլադիմիր Պուտինի հրամանով՝ հուլիսի 8-ից դադարեցվելու է Վրաստանի հետ ավիահաղորդակցությունը: Չենք կարող ասել, թե վաղն ինչ կլինի, սակայն ներկայում ռուսական կողմից դեպի Վրաստան մուտքի արգելք սահմանելու վերաբերյալ հրաման չի ստացվել»,- հավելել է զրուցակիցը: