Նիկոլ Փաշինյանը նպատակահարմար չի համարում ընդդիմության կառավարմանը հանձնել վարչապետին առընթեր մարմինը

ՀՀ վարչապետ Նիկոլ Փաշինյանը նպատակահարմար չի համարում ընդդիմության առաջարկով վարչապետին առընթեր մարմնի կառավարումն ընդդիմությանը հանձնելը:Այսօր ԱԺ-ում կառավարության հետ հարց ու պատասխանի ժամանակ ասաց վարչապետը՝ պատասխանելով ԲՀԿ խմբակցության պատգամավոր Սերգեյ Բագրատյանի հարցին:

«Տարիներ շարունակ պնդում էիք, որ իշխանությունը պետք է ընդդիմությանը փոխանցի կառավարման վերահսկիչ գործառույթները: Արդյո՞ք  պատրաստ եք տարիների պայքարն իրականացնել, մասնավորապես Պետական վերահսկողական ծառայությունն ու Հաշվեքննիչ պալատը փոխանցել ընդդիմության կառավարմանը»,-հարցրեց պատգամավորը:

Փաշինյանը նախ ասաց, թե չի հիշում` երբևէ խորհրդարանում ասած լինի, թե ընդդիմությանը վերահսկողական լծակներ տալու անհրաժեշտության կա, քանի որ միշտ էլ համարել է, որ ընդդիմությունը վերահսկողական բոլոր լծակներն ունի, ու դրա համար պետք չէ, որ ինչ-որ կարգավիճակ ունենա:

«Մեր նախորդ հարց ու պատասխանից հետո ես պարտավորություն ստանձնեցի, որ և Տնտեսական մրցակցության պաշտպանության հանձնաժողովում և Հանրային ծառայությունները կարգավորող հանձնաժողովում ընդդիմությանը կտրամադրվեն տեղեր, և ես կներկայացնեմ ընդդիմության ներկայացրած թեկնածուին: Դրանից հետո ԲՀԿ-ն հրաժարվեց թեկնածու ներկայացնել՝ պատճառաբանելով, թե նկատի է ունեցել ոչ թե շարքային անդամներին, այլ հանձնաժողովների նախագահին: Տեսեք, թե ինչ տարօրինակ է հնչում՝ վարչապետին առընթեր ՊՎԾ-ն հանձնել ընդդիմությանը: Իսկ վարչապետի խորհրդականի և օգնականի ինստիտուտի մասին ի՞նչ կարծիքի եք, արժե՞  այսպիսի գաղափար քննարկել, որ վարչապետի օգնականները բոլորը լինեն ընդդիմությունից, արտախորհրդարանական ուժերից»,-ասաց Փաշինյանը:

Փաշինյանի խոսքով` Հաշվեքննիչ պալատն  անկախ մարմին պետք է լինի և իր փիլիսոփայությունը հենց անկախ լինելու մեջ է, և դա միջազգայնորեն է այդպես: ՀՀ-ում հաստատված է ազատ ընտրությունների մեխանիզմ, և ընդդիմությունն էլ ժողովրդի միջոցով հնարավորություն ունի վերցնել այնքան լծակներ, ինչքանով ժողովուրդն ուզում է օժտել իրեն: Եվ այդ մեխանիզմի գործադրմամբ ընդդիմությունը տարբեր ընտրություններում, այդ թվում ՏԻՄ ընտրություններում լծակներ ունենալու և բալանս ապահովելու հնարավորություն ունի: