Դեռևս զանգվածային կրճատումներ չկան ու առաջին փուլում չեն պլանավորվում. Ավինյան

Նախարարությունների կրճատումն ընդհանուր քաղծառայության համակարգի բարեփոխման առաջին նախնական փուլն է. կառավարության նիստից հետո լրագրողների հետ զրույցում ասաց փոխվարչապետ Տիգրան Ավինյանը:

«Քաղծառայության ռեֆորմն իրենից ենթադրելու է մի քանի փուլ, առաջին հերթին մենք ընդհանուր ստրատեգիա ենք որդեգրելու` քաղծառայության համակարգի զարգացման, օպտիմալացման ու արդյունավետության բարձրացման»,- ասաց նա:

Տիգրան Ավինյանը նշեց, թե կդժվարանա պատասխանել՝ քանի փոխնախարար կլինի ամեն նախարարությունում: «Գործառույթներից ելնելով է որոշվելու: Գնահատելու ենք, թե ինչ ֆունկցիաներ են նախկինում եղել փոխնախարարների վրա, արդյո՞ք թերբեռնված կամ գերբեռնված են եղել այդ փոխնախարարները, ու ըստ ֆունկցիաների ու գործառույթների` քանակները կհստակեցվեն», - հավելեց նա:

Փոխվարչապետը տեղեկացրեց, որ դեռևս զանգվածային կրճատումներ չկան ու առաջին փուլում չեն էլ պլանավորվում: