Չավուշօղլուն հերքել է Ս-400-ների գնումը հետաձգելու մասին լուրերը

Թուրքիայի արտաքին գործերի նախարար Մևլութ Չավուշօղլուն պատասխանել է օրերս տարածված այն տեղեկություններին, ըստ որոնց` ԱՄՆ-ն Թուրքիային առաջարկել է մինչև 2020 թ. հետաձգել Ռուսաստանից Ս-400 ՀՕՊ համակարգերի գնումը:

«Եթե աշխատանքային խումբ է ստեղծվելու, նախապայման է, որ մենք ղեկավարենք այն: Թող դա մասնագետները որոշեն: Կառուցողական առաջարկ ենք արել: Եթե ԱՄՆ-ն վստահում է ինքն իրեն, պետք է որոշում կայացնի: Ինչո՞ւ են խոսում հետաձգման մասին: Սա ավարտված համաձայնագիր է: Ս-400-ների վերաբերյալ հետաձգման կամ դադարեցման օրակարգ չկա: Այս նախապայմաններում համաձայնության գալն անհնար է»,- Չավուշօղլուի խոսքերն է մեջբերում Sputnik-ի թուրքական ծառայությունը: