Հրապարակային կրոնափոխությունը կեղծ էր. Փայլանն արձագանքել է

Թուրքիայում մայիսի 12-ին հեռուստահաղորդումներից մեկի ժամանակ 13-ամյա հայ Արթուրի կրոնափոխության լուրերը չեն համապատասխանում իրականությանը: Այս մասին հայտնել է Թուրքիայի Ազգային մեծ ժողովի պատգամավոր Կարո Փայլանը, որը հանդիպել է Արթուրի մոր հետ:

Իր ֆեյսբուքյան էջում Փայլանը նշել է. «Տեսակցեցայ Նիհաթ Հաթիպօղլուի կողմէ շահագործուած Արթուրի մօր հետ։
Յայտնեց, թէ յիշեալ հաղորդման մէջ իր զաւկին ներկայութիւնը եղած է առանց իր արտօնութեան։
Վաղը պաշտօնական գանգատ պիտի յայտնեմ Ռատիոյի ու հեռատեսիլի բարձրագոյն խորհուրդին եւ դատախազութեան՝ մանկանց շահագործում իրականացուցած այս հաղորդման դէմ»:

Արթուրի մայրը` Ալինա Ենգիբարյանը, լուրի տարածումից հետո կապ է հաստատել Փայլանի հետ և նշել, որ իր երեխան միանշանակ մուսուլման չէ:

Թուրքական Evrensel թերթի հետ զրույցի ընթացքում քրդամետ Ժողովուրդների դեմոկրատական կուսակցության պատգամավոր Փայլանը հայտնել է, որ հաղորդման ժամանակ աստվածաբան, իսլամիստ քարոզիչ Նիհաթ Հաթիփօղլուի` երեխայի ծնողների համաձայնություն ստանալու հայտարարությունը, իրականությանը չի համապատասխանում:

Փայլանը, տեղեկացնելով, որ ընտանիքը արդեն տևական ժամանակ ապրում է Թուրքիայում, նշել է. «Նրա մայրը դեպքի վերաբերյալ ինձ դիմեց: Ասաց, որ դա առանց իր համաձայնության է եղել: Նրա թուրքերենը թերի թուրքերեն էր: Պատմել է, որ շոկի է ենթարկվել` տեսնելով վիդեոհոլովակը: Ասաց, որ իր երեխային շահագործել են, նա կտրականապես մուսուլման չէ»:

Կարօ Փայլանը դեպքը մեծ սկանդալ է որակել և հավելել. «Երեխայի ընկերն ասել է, որ «այնտեղ շատ հայտնի մարդիկ են լինելու, ուտելիք են տալու» և տարել է այդ ծրագրին: 13 տարեկան երեխայի մասին ենք խոսում: Ակնհայտ երեխայի շահագործման փաստի առաջ ենք կանգնել»:

«Անհրաժեշտ քայլերի կդիմեմ: Այս գործին հետամուտ եմ լինելու և RTÜK-ի (Ռադիոյի և հեռուստատեսության բարձրագույն խորհուրդ) նկատմամբ բողոք եմ ներկայացնելու, հանդիպելու եմ Ընտանիքի և սոցիալական քաղաքականությունների նախարարության հետ». – նշել է հայազգի պատգամավորը: