Ադրբեջանի մեջլիսի նախագահը կոչ է արել պատգամավորներին` հանդես չգալ ռազմատենչ հայտարարություններով

Ադրբեջանի Միլի Մեջլիսի նախագահ Օքթայ Ասադովը կոչ է արել պատգամավորներին` զերծ մնալ Արցախյան հակամարտությունը ռազմական ճանապարհով լուծելու կոչերից. հաղորդում է Interfax-ի ադրբեջանական գործակալությունը:

«Ինչի՞  կարող ենք հասնել` միայն նմանատիպ զգացմունքային, պատերազմի կոչեր անելով: Եթե հնարավոր է խնդիրը խաղաղ ճանապարհով լուծել, ապա ինչո՞ւ ենք դեմ այդ մոտեցմանը»,- նշել է նա:

Ըստ Ասադովի` պատգամավորները պետք է զգույշ մոտենան խնդրին: «Ադրբեջանի նախագահ Իլհամ Ալիևը միշտ հայտարարում է, որ մեր տարածքային ամբողջականությունը քննարկման ենթակա չէ: Այդ իսկ պատճառով պատգամավորները պետք է զգույշ լինեն իրենց` պատերազմի կոչերում»,- հայտարարել է խորհրդարանի խոսնակը: