«Մենք առաջնահերթություն ենք հայտարարել գյուղատնտեսության և զբոսաշրջության ոլորտները». Նիկոլ Փաշինյանը ԵՊՀ-ում է

ՀՀ վարչապետ Նիկոլ Փաշինյանն այսօր` ապրիլի 22-ին, ԵՊՀ մասնաշենքում հանդիպեց տնտեսագիտության և կառավարման ֆակուլտետի պրոֆեսորադասախոսական կազմի և ուսանողների հետ:

Հանդիպման ընթացքում Փաշինյանը մանրամասնեց, որ, իրենց քաղաքական թիմի պատկերացմամբ, 10 տարում ՀՀ 10 խոշոր ձեռնարկությունները պետք է լինեն ՏՏ ոլորտի ընկերությունները: Նա, միևնույն ժամանակ, հավելեց, որ ՀՀ կառավարությունը պետք է վարի բարձր աշխատավարձերի քաղաքականություն, որը կապված է կրթության հետ:  «Կրթական համակարգը պետք է ի վիճակի լինի Հայաստանին ապահովել, ուսանողներին ապահովել բարձր որակավորմամբ»,- ասաց նա:

Ըստ վարչապետի` Հարկային օրենսգրքով արդեն նախատեսվում է, որ եկամտահարկը պետք է դառնա համահարթ` 23 տոկոս, իսկ մի քանի տարի անց՝ 20 տոկոս:

Անդրադառնալով գյուղատնտեսության և զբոսաշրջության ոլորտին` վարչապետն ընդգծեց. «Մենք առաջնահերթություն ենք հայտարարել գյուղատնտեսության և զբոսաշրջության ոլորտը, և այն աշխատուժը, որը բարձր տեխնոլոգիաներով չի կարողանա զբաղվել, կտեղավորվի այս հատվածում»:

Նիկոլ Փաշինյանի խոսքով՝ տնտեսական հեղափոխության մեթոդը լինելու է նույն քաղաքական հեղափոխության նման, որտեղ առանցքը անհատական ջանքն է և քաղաքացիներին խրախուսելը:

«Հույս ունենք, որ բորսայական համակարգն առաջիկայում կզարգանա: Մենք նույնպես աշխատանք ենք տանում այս ուղղությամբ: Խրախուսելու ենք մասնավոր ընկերություններին, որ իրենք էլ գնան այդ ճանապարհով»,- շեշտեց նա: