Արցախին շտապօգնության մեքենաներ տրամադրելու գործընթացը հարթ չի ընթացել

Մոտ երկու շաբաթ առաջ հասարակությունը մեծ ոգևորությամբ ընդունեց առողջապահության նախարար Արսեն Թորոսյանի այն հայտարարությունը, թե Արցախի Հանրապետությունը մոտ ժամանակներս շտապօգնության 10 ավտոմեքենա կստանա: Պարզվում է` հայկական երկրորդ հանրապետությանը շտապօգնության մեքենաներ տրամադրելու պրակտիկան եկել է նախորդ կառավարությունից:

«Նախկինում առողջապահության նախարարությունը Չինաստանից նվեր ստացած մեքենաներից 10-ը տրամադրում էր Սյունիքի մարզին` Գորիսին, ապա, ներքին կարգով, այդ մեքենաները տրամադրվում էին Արցախին: Այս անգամ էլ նույն եղանակով տրամադրվել է, մեքենաները հասել են Արցախ, բայց նախարար Արսեն Թորոսյանը, չգիտես` ինչու, որոշել է հետ կանչել այդ մեքենաները»,- տեղեկացրեց Yerkir.am-ի զրուցակիցը:

Yerkir.am-ը ՀՀ առողջապահության նախարարությանը խնդրեց տեղեկություն տրամադրել այն մասին, թե շտապօգնության ի՞նչ մեքենաներ և ի՞նչ ժամանակահատվածում են տրամադրվելու Արցախին: Նախարարության աշխատակիցները մեզ խնդրեցին հարցը գրավոր ուղարկել:

Ի տարբերություն Հայաստանի ԱՆ-ի, Արցախի համապատասխան գերատեսչությունից մեր հարցմանը պատասխանեցին րոպեների ընթացքում: «Ավտոմեքենաների տրամադրման գործընթացը սկսվելու է 3-5 ամսվա ընթացքում: Պայմանավորվածություն կա, որ դրանք լինելու են նոր մակնիշի մեքենաներ: Ինչ վերաբերում է հարցին, որ մեքենաները տրամադրվել են, այնուհետ հետ կանչվել, մենք նման ինֆորմացիայի չենք տիրապետում»,- հայտնեցին մեզ: