Մարուքյանի` Սիրիա մեկնելու առաջարկը մերժվել է

Եթե երկրից զինվոր է դուրս գալիս, ինչ անունով էլ դա լինի, պետք է ընթացակարգը պահպանվի և անցնի խորհրդարանով, սակայն այս անգամ խորհրդարանը շրջանցվել է, ու մեր զինվորները գնացել են` առանց խորհրդարանի հաստատման. այսօր խորհրդարանական ճեպազրույցների ժամանակ ասաց «Լուսավոր Հայաստան» խմբակցության ղեկավար Էդմոն Մարուքյանը` նշելով, որ խմբակցությունը դիմել է ԱԺ նախագահին՝ պահանջելով ԱԺ արտաքին հարաբերությունների հանձնաժողովի կողմից ձևավորել խումբ և մեկնել Սիրիա՝ այցելելով այնտեղ հումանիտար առաքելություն իրականացնող հայկական խմբին:

Պատգամավորը հայտնեց, որ այսօր արտաքին հարաբերությունների և պաշտպանության  հանձնաժողովների փակ նիստում իր առաջարկը մերժվել է:  «Բայց ձեռք է բերվել պայմանավորվածություն, որ խորհդարանական վերահսկողության այլ լծակներ կլինեն, թեև ես, մեծ հաշվով, չեմ պատկերացնում, որ եթե այց չկա,  ի՞նչ պետք է անենք, չգիտեմ»,- ասաց Մարուքյանը: