Տեսախցիկները 5 օր է` տեղադրված են, եթե խնդիրներ կային, կարող էին ասել. քաղաքապետի տեղակալ

Երևանի քաղաքապետի առաջին տեղակալ Հրաչյա Սարգսյանն այսօր քաղաքապետարանում լրագրողների հետ զրույցում հայտնեց, որ տեսախցիկներն ավտոբուսներում հինգ օր է, ինչ տեղադրված են:

«Դրանք նոր չեն տեղադրվել: Եթե խնդիրներ կային, կարող էին ասել, որ` չենք ուզում, կամ տարբեր հարցադրումներ լինեին, բայց այդպիսիք չեն եղել», - նշեց քաղաքապետի տեղակալը։

Նա ընդգծեց` տեսահսկման համակարգը հնարավորություն է տալիս վերահսկելու և տեսնելու՝ վարորդը ծխում է, թե` ոչ, ինչպիսին է նրա պահվածքը։

«Այս պահի դրությամբ ընդամենը այդքան հնարավորություն է տալիս տեսախցիկը։ Մյուս փուլով նախատեսում ենք, որ համապատասխան հնարավորություն ենք ստեղծելու, որպեսզի տեսախցիկ տեղադրվի նաև ուղևորներին տեսահսկելու համար»,- ասաց Հրաչյա Սարգսյանը։

Հիշեցնենք, որ առավոտից «Երևանի Ավտոբուս» ՓԲԸ-ի 250-ից ավելի վարորդներ հրաժարվում են դուրս գալ երթուղի`ի նշան բողոքի: