Թուրքիայում ոստիկանը 20 ամսով ազատազրկվել է ցուցարարի ձեռքը կոտրելու համար

Թուրքական դատարանը մեկ տարի ութ ամիս ազատազրկման է դատապարտել ոստիկանության սպային 2017 թվականին մայրաքաղաք Անկարայում ցույցերի ժամանակ ցուցարարի ձեռքը կոտրելու համար:

Դատարանը հետաձգել է դատավճռի իրագործումը՝ համոզմունք հայտնելով, որ ոստիկանության աշխատակիցը «այլևս հանցագործություն չի կատարի իր անձնական որակների հիման վրա և հաշվի առնելով այն փաստը, որ չունի քրեական հետապնդում». հայտնում է Gazeteduvar-ը:

Պատժի հետաձգումը նշանակում է, որ ոստիկանության աշխատակիցը չի գնա բանտ, եթե հաջորդ հինգ տարվա ընթացքում հանցանք չկատարի:

Անկարայի առաջին ատյանի քրեական դատարանը հայտարարել է, որ տեսախցիկները ցույց են տվել, որ ոստիկանը ցուցարար Զեյնալ Դանաջիի ձեռքն այնպես է ոլորել, որ կոտրել է այն: Ի պաշտպանություն իրեն՝ ոստիկանության աշխատակիցը նախկինում ասել է, որ ինքը փորձել է Դանաջիին բերման ենթարկել «օրենքի շրջանակներում»:

Հրապարակման մեջ նշվում է, որ զոհը վիրավորվել է այն ժամանակ, երբ Անկարայի ոստիկանությունը փորձել է ցրել 2017 թվականի հուլիսի 23-ին հացադուլ հայտարարած ուսուցիչներ Նուրիե Գյուլմենին և Սեմիհ Օզաքչային սատարող բողոքի ցույցը: