Ադրբեջանի՝ բանակի ստորաբաժանումները սահմանապահներով փոխարինելը սահմանային իրավիճակում որևէ փոփոխություն չի մտցրել. ՀՀ ԶՈւ ԳՇ պետ

Նախորդ տարիների համեմատ` հայ-ադրբեջանական սահմանին կրակոցների քանակի նվազման միտում կա: Այս մասին  ՀՀ ՊՆ կենտրոնական հավաքակայանում լրագրողների հետ զրույցում ասաց ՀՀ ԶՈՒ գլխավոր շտաբի պետ Արտակ Դավթյանը:

«Սահմաններին էական փոփոխություն չկա: Հրադադարի ռեժիմը հիմնականում պահպանվում է: Եթե նախորդ տարիների հետ համեմատենք՝ որոշակի մասով կրակոցների քանակի նվազման միտում կա»,- հայտնեց նա:

Հարցին՝  ի՞նչ փոփոխություն է մտցրել Ադրբեջանի՝ հայ-ադրբեջանական սահմանի Ղազախ-Աղստաֆա հատվածում բանակի ստորաբաժանումները սահմանապահներով փոխարինելը, Դավթյանը պատասխանեց. «Սահմանի իրավիճակում որևէ փոփոխություն չի մտցրել, և չեմ կարծում, որ կմտցնի: Այս պահի դրությամբ որևէ դրական կամ բացասական ազդեցություն չի կատարվել այդ ուղղությամբ: Հետագայում կողջունենք, եթե սկսենք բանակցություններ` և' սահմանի որոշման խնդրով, և' ընդհանուր ծառայության կազմակերպման ուղղությամբ»:

ՀՀ ԶՈՒ ԳՇ պետը հավելեց, որ հայկական կողմն իր մասով կատարում է որոշակի խնդիրներ՝ առանց հայտարարելու և միակողմանի: