Միջազգային կամավորական և մշակութային դիմակահանդես` Մեղրաձորում

Դեկտեմբերի 12-ին Մեղրաձորի միջնակարգ դպրոցի 100 աշակերտներ մասնակցել են միջազգային կամավորական և մշակութային դիմակահանդեսի, որը կազմակերպել է ՊԱՏՄԻ մշակութային ՀԿ-ն` Բրյուսովի անվան լեզվաբանական համալսարանի մասնակցությամբ:  Այն նպատակ ունի  Հայաստանի գյուղերում արվեստի, պատմասացության և կրթության միջոցով պահպանել և պատմել մարդկանց պատմությունները:

Այս միջոցառման համար ԴԵՊԻ ՀԱՅՔ-ի, Armenian Volunteer Corps-ի, European Voluntary Service-ի և ԵՊԼՀ-ի 40 կամավորներ այցելել են Մեղրաձոր՝ երեխաներին (12-18 տարեկան) անմիջականորեն ներկայացնելու Իսպանիայի, Ֆրանսիայի, Չինաստանի, Հարավային Կորեայի, Գերմանիայի, Ավստրիայի, Եգիպտոսի, Շոտլանդիայի, Լեհաստանի և Հունաստանի մշակույթը, ավանդույթները և լեզուները, հնարավորություն տվել երեխաներին ճանապարհորդելու աշխարհում` առանց Մեղրաձոր գյուղից դուրս գալու:

Ծրագիրը բաղկացած է եղել լեզվի, աշխարհագրության դասերից, պարից, երգից, պոեզիայից:

Միջոցառման ընթացքում երեխաները, բաժանվելով խմբերի, գործնական դասընթացներում ծանոթացել են ամեն երկրի մշակութային առանձնահատկություններին: Օրինակ` ինչպես է կատարվում չինական թեյախմությունը, ինչպես պարել  շոտլանդական ավանդական «Գեյ Գորդոնս» պարը, երգել Ժո Դասենի «Շանզ Էլիզե» երգը ֆրանսերենով և այլն: