Թուրքիան Հյուսիսային Կիպրոսում ռազմածովային բազա է հիմնում

Թուրքիան որոշել է Հյուսիսային Կիպրոսի թուրքական ինքնահռչակ հանրապետության ափերին հիմնել ռազմածովային բազա։ Թուրքիայի ռազմածովային ուժերի պատվիրակությունը Հյուսիսային Կիպրոսի ափերին մի շարք ուսումնասիրություններ է իրականացրել, որոնց վերաբերյալ համապատասխան եզրակացություններն ուղարկվել են Թուրքիայի կառավարությանը. տեղեկացնում է Ermenihaber-ը:

Մասնավորապես` ուսումնասիրվել է, թե հատկապես որ մասում է նպաստավոր հիմնել ռազմաբազա և դրա շինարարության արժեքը ինչքան կկազմի։  Նախատեսվում է, որ ռազմածովային բազան կընդգրկի 280 000  քառ.կմ ջրային տարածք։

Ռազմաբազան հագեցված է լինելու ժամանակակից տեխնոլոգիաներով։ Այնտեղ կկայանվեն Թուրքիայի ռազմածովային ուժերին պատկանող տարբեր տեսակի ռազմանավեր, սուզանավեր, կորվետներ, ինչպես նաև ռազմական ուղղաթիռներ։    

Կիպրոսում ռազմաբազա հիմնելու առաջարկն արվել է դեռևս օգոստոսին  Թուրքիայի ռազմածովային ուժերի կողմից։ Թուրքիայի արտգործնախարարությանն ուղղված առաջարկության  մեջ ասվում է, որ ստեղծվելիք ռազմաբազան ամրապնդելու է Հյուսիսային Կիպրոսի և Թուրքիայի դիրքերը Միջերկրական ծովում։ Նշվում է, որ դրանով կանխվելու է «ծովի էներգետիկ պաշարներով հարուստ տարածքների օկուպացումը այլ երկրների կողմից»։ Ռազմաբազայի առկայությունն ամրապնդելու է նաև Հյուսիսային Կիպրոսի դիրքերը կիպրոսյան հիմնախնդրի շուրջ շարունակվող բանակցային գործընթացում։