Թուրքիան ռազմաբազա է հիմնում Իրաքի հյուսիսում

Թուրքիան Իրաքի Մոսուլի շրջանի Բաշիքա քաղաքում, ավելացնելով իր ռազմաճամբարի զորաքանակը, հիմնում է 600 հոգանոց զորակազմով ռազմաբազա: Համապատասխան համաձայնագիրը կնքվել էր նոյեմբերի 4-ին Թուրքիայի նախկին արտգործնախարար Ֆերիդուն Սինիրօղլուի և իրաքյան Քուրդիստանի ղեկավար Մասուդ Բարզանիի հանդիպման ժամանակ:

Ըստ ձեռք բերված համաձայնության՝ Թուրքիայի Շիրթ նահանգից 400 հոգուց կազմված 3-րդ հարվածային բրիգադը (դեսանտադիվերսիոն ստորաբաժանումներ) 25 տանկի շարասյունով ուղարկվել է Բաշիքա. տեղեկացնում է Ermenihaber-ը:

Թուրքական «Haberler» լրատվակայքը տեղեկացնում է, որ ավելի քան 2 տարի է, ինչ թուրքական ԶՈւ ստորաբաժանումները մարզում են քրդական Փեշմերգե ջոկատներին և «Իսլամական պետություն» ահաբեկչական խմբավորման դեմ պայքարող այլ ուժերի:

Թուրքական զորախմբի ուղարկումը հյուսիսային Իրաք առաջացրել է Իրաքի իշխանությունների  դժգոհությունը: Մասնավորապես երկրի խորհրդարանի անվտանգության հարցերով հանձնաժողովի ղեկավար Հաքիմ ալ Զամիլին Անկարայի այդ քայլը որակել է որպես «թուրքական ներխուժում»: