Սերժ Սարգսյանը մասնակցելու է ընտրությանը. Վիգեն Սարգսյան

Հայաստանի Հանրապետական կուսակցության նախընտրական ցուցակը գլխավորող Վիգեն Սարգսյանն ընտրության է գնացել ընտանիքի հետ: Նա քվեարկությունը կատարեց 9/47 ընտրատեղամասում:

Քվեարկությունից հետո լրագրողների հետ զրույցում Վիգեն Սարգսյանն ասաց, որ մեծ ակնկալիք ունի, որ  հանրությունն այսօր ակտիվ կմասնակցի ընտրություններին:

«Դա շատ կարևոր է, քանի որ երկրի համար վճռորոշ պահերին անհրաժեշտ է համախմբվածություն: Ամենավերջին բանը, որ մարդն այսօր կարող է անել, տանը նստելն է»,- ասաց նա:

Սարգսյանը կոչ արեց ընտրողներին` անպայման մասնակցել ընտրություններին: «Ակնկալում եմ, որ օրվա վերջին կունենանք ավելի համախմբված հանրություն: Ես քվեարկել եմ այն Հայաստանի համար, որտեղ որևէ մեկի մտքով չի անցնի Հայաստանը բաժանել սևերի ու սպիտակների, դա ճանապարհ է դեպի ներքին թշնամու ձևավորում: Մեզ անհրաժեշտ է ավելի ամուր, ավելի զարգացած պետություն: Մեր մարտահրավերները շատ մեծ են: Ես ակնկալում եմ, որ այսօրվա քվեարկությունից հետո  մենք կունենաք երկիր, որտեղ անվտանգության, պաշտպանության հարցերում մենք կհենվենք գիտելիքի, փորձի վրա»,- նշեց նա:

Սարգսյանը տեղեկացրեց, որ ՀՀ երրորդ նախագահ Սերժ Սարգսյանը մասնակցելու է ընտրություններին: «Վստահ եմ։ Նա ակտիվ քաղաքացի է, և վստահ եմ, որ կմասնակցի»,-  ասաց Սարգսյանը։