Բակո Սահակյանը գնահատել է ՀՅԴ-ի ներդրումը Արցախի պետականության ամրապնդման գործում

Պաշտոնական այցով Լոս Անջելեսում գտնվող Արցախի Հանրապետության նախագահ Բակո Սահակյանը նոյեմբերի 20-ին այցելել է ՀՅԴ Արեւմտյան Ամերիկայի Կենտրոնական կոմիտեի գլխավոր գրասենյակ և հանդիպել ԿԿ անդամների հետ:

Հանդիպման ժամանակ նախագահն անդրադարձել է Արևմտյան Ամերիկայի Հայ Յեղափոխական Դաշնակցության` Արցախին ցուցաբերած հետևողական և լայն աջակցությանը, ինչպես նաև «Հայաստան» համահայկական հիմնադրամի ծրագրերին անվերապահ զորակցությանը՝ մեծապես գնահատելով կուսակցության ներդրումը Արցախի պետականության ամրապնդման գործում:

ՀՅԴ ներկայացուցիչները, ողջունելով նախագահի այցելությունը, գնահատել են այն մեծ աշխատանքը, որ իրականացվում է Արցախում, և պատրաստակամություն են հայտնել առավել թափով աջակցել Արցախի ժողովուրդին՝ իր հայրենի հողին վրա արժանապատիվ կյանք ապահովելու համար: ՀՅԴ ԿԿ անդամները հատկապես գնահատել են Արցախի Պաշտպանության բանակի զինվորների` հայրենի հողի պաշտպանության առաքելությունը:

Հանդիպման ժամանակ քննարկվել են Արցախի ներքին և արտաքին քաղաքականությանը, Արցախ-Սփյուռք համագործակցությանը և տարածաշրջանային գործընթացներին վերաբերող զանազան հարցեր:

Նշենք, որ նախագահ Սահակյանը Լոս Անջելեսում հանդիպել է նաև Սոցիալ Դեմոկրատ Հնչակյան կուսակցության և Ռամկավար Ազատական կուսակցության շրջանային ղեկավար մարմինների ներկայացուցիչների հետ:

asbarez.com