Չկա քարոզարշավի ժամկետի հետ կապված միջազգային չափանիշ. ԵԱՀԿ/ԺՀՄԻԳ առաքելության ղեկավար

Նշանակված ընտրությունները համապատասխանում են գործող օրենքին: «Ես հանդիպել եմ ԿԸՀ նախագահի հետ: Նա դժվար առաջադրանք ունի, բայց խոստացել է արագ աշխատել»,- լրագրողների հետ հանդիպման ժամանակ նշեց ԵԱՀԿ/ԺՀՄԻԳ դիտորդական առաքելության ղեկավար, դեսպան Ուրշուլա Գաչեկը՝ հավելելով, որ կուսակցությունները հասցնում են պատրաստել իրենց ցուցակները: 

«Իհարկե, քաղաքական առումով անակնկալ էր նրանց համար, բայց մինչ այժմ չենք նկատել, թե սեղմ ժամկետը որևէ խոչընդոտ է առաջացնում ցուցակ կազմելու, թեկնածուներ գրանցելու հարցում: Ի վերջո, կան գործողություններ, որոնք արգելված չեն մինչ քարոզարշավի մեկնարկը: Չկան քարոզարշավի ժամկետի հետ կապված միջազգային չափանիշներ, դրանք վերաբերում են միայն թեկնածուների հավասար հնարավորություններին»,- շեշտեց առաքելության ղեկավարը՝ պատասխանելով հարցին, թե արդյո՞ք քաղաքական ուժերը կհասցնեն 12 օրվա ընթացքում հանրությանը ներկայացնել իրենց ծրագրերը: