ՀԱՊԿ գլխավոր քարտուղարի փոփոխման հարցին են ուղղված այս պահին ընթացող խորհրդակցությունները. Կարեն Նազարյան

2019 թվականի բյուջեի նախագծի քննարկման ժամանակ ԱԳ նախարարի տեղակալի պաշտոնակատար Կարեն Նազարյանից «Ծառուկյան» խմբակցության պատգամավոր Նաիրա Զոհրաբյանը հետաքրքրվեց` արդյո՞ք ՀԱՊԿ գլխավոր քարտուղարի թեկնածությունը քննարկվելու է: «Ի վերջո, այս պահին քվոտան պատկանում է ՀՀ-ին, և վերլուծական  շրջանակներից տպավորություն կա, որ կա'մ ՀՀ-ի կողմից ներկայացուցիչ չի ներկայացվելու, կա'մ այդ հնարավոր թեկնածությունը չի հաստատվելու»,- ասաց պատգամավորը:

Նա նաև նշեց, որ նոյեմբերի 8-ին Աստանայում տեղի է ունենալու ՀԱՊԿ գագաթաժողովը, ապա հարցրեց` ՀԱՊԿ գլխավոր քարտուղարի  թեկնածության հարցը քննարկվելո՞ւ է, թե՞ ոչ:

Նազարյանը պատասխանեց, որ ՀԱՊԿ քարտուղարությունը տարածել է հայտարարություն Յուրի Խաչատուրովի հետկանչի և ժամանակավոր փոխարինման մասին:

«ՀԱՊԿ գլխավոր քարտուղարի նշանակման հարցը քննարկվում է քաղաքական անվտանգության խորհրդի կողմից` արտաքին գործերի նախարարների խորհրդի առաջարկությամբ: ՀԱՊԿ գլխավոր քարտուղարի փոփոխման հարցը որևէ կերպ կարգավորված չէ, և հենց դրան են ուղղված այն խորհրդակցությունները, որոնք այս պահին ընթանում են: Դեռևս այսքանը, և ես չէի ցանկանա կանխատեսել ամսի 8-ի որոշումը: Նիստը փակ է, սպասենք, տեսնենք՝ ինչ կորոշվի»,- ասաց նա: