Ստամբուլի դատախազությունը Սաուդիան Արաբիայից պահանջում է հանձնել սաուդցի լրագրողի սպանության մեջ կասկածվողներին

Ստամբուլի գլխավոր հանրապետական դատախազությունը սաուդցի լրագրող Ջեմալ Խաշուկջիի սպանության գործի շրջանակներում Սաուդիան Արաբիայից պահանջել է Թուրքիային հանձնել 18 կասկածյալի։ Պահանջագիրն ուղարկվել է Թուրքիայի արդարադատության նախարարություն։

Ըստ Ermenihaber-ի՝ դատախազության պահանջի վերաբերյալ հայտարարություն է արել արդարադատության նախարար Աբդուլհամիդ Գյուլը՝ նշելով, որ ակնկալում են, որ նշյալ անձինք թուրքական դատարանի առջև կանգնեն։ Ըստ նրա՝ լրագրողի դաժան սպանությունից հետո Ստամբուլի դատախազությունն առանց հապաղելու հետաքննություն է սկսել և շարունակում է ապացույցների մանրակրկիտ ուսումնասիրությունը։

«Սրան հաջորդող փուլն այս պահանջագրի կատարումը պետք է լինի։ Այդ դաժան դեպքը կատարվել է Ստամբուլում։ Թուրքիայի վարչական օղակները և արդարադատություն իրականացնող մարմիններն այս դեպքը բացահայտելու հարցում վճռական են տրամադրված»,- ասել է Գյուլը։

Նշելով, թե ակնկալում են, որ կասկածյալներին կհանձնեն թուրքական արդարադատությանը, նա ընդգծել է՝ շատ կարևոր է, որ այս հարցում Սաուդիան Արաբիայի պատկան մարմինները համագործակցեն իրենց հետ։