Ադրբեջանն այն կայուն երկիրը չէ, ինչպիսին կցանկանար լինել. Զատուլին

ՌԴ Պետդումայի ԱՊՀ հարցերով, եվրասիական ինտեգրման ու հայրենակիցների հետ կապերի հանձնաժողովի փոխնախագահ Կոնստանտին Զատուլինը մեկնաբանել է ադրբեջանցի պատգամավոր Գուդրաթ Հասանղուլիևի այն հայտարարությունը, համաձայն որի` Ռուսաստանն «օկուպացրել է» Լեռնային Ղարաբաղը. հայտնում է ruposters.ru-ն:

Զատուլինի խոսքով` ադրբեջանցի պատգամավորի խոսքերը վկայում են, որ Ադրբեջանի իրական քաղաքականությունը ՌԴ-ի նկատմամբ կարող է էականորեն տարբերվել ցուցադրվողից:

«Ադրբեջանի վարած քաղաքականության ու նրա միջև, թե ինչ է Ադրբեջանը ցանկանում, որ մենք մտածենք իր քաղաքականության մասին, մեծ տարբերություն կա: Եվ դա հերթական դեպքն է, որը դա ցույց է տալիս: Իհարկե, կան որոշ անկեղծ մարդիկ խորհրդարանում, որոնք ցանկանում են իրերն իրենց անուններով կոչել: Ինձ նրանք պակաս վտանգավոր են թվում, քան նրանք, ովքեր պատմում են Ռուսաստանի հանդեպ հրաշալի վերաբերմունքի մասին, սակայն ամեն պահի պատրաստ են հարվածել ՌԴ-ին»,- ասել է նա:

Խոսելով ԼՂ հիմնահարցի մասին` Զատուլինը նշել է, որ Ադրբեջանը չի ցանկանում փոխզիջում: «Նրանք ցանկանում են վերցնել իրենցը սպառազինությունների, ռազմական բյուջեի մեծացման,  ռազմական սպառնալիքի մեծացման հաշվին: Մենք դրանում կտրականապես հետաքրքրված չենք, և այդ իսկ պատճառով իմ և գործընկերների ջանքերն ուղղված են Ղարաբաղում նոր պատերազմ թույլ չտալուն: Եվ այս իմաստով մեր հակառակորդները դառնում են Ադրբեջանի ղեկավարներն ու քաղաքական շրջանակները, որոնք շատ են խոսում պատերազմի հավանականության մասին: Դա, ի դեպ, կարող է ավարտվել Ադրբեջանի փլուզմամբ: Դա այն կայուն երկիրը չէ, ինչպիսին կցանկանար լինել»,- ասել է նա: