Խորհրդարանը քննարկում է ԿԲ խորհրդի անդամի թեկնածուի ընտրության հարցը

ԱԺ-ն քննարկում է Կենտրոնական բանկի խորհրդի անդամի ընտրության հարցը: ԱԺ ֆինանսավարկային և բյուջետային մշտական հանձնաժողովը ԿԲ խորհրդի անդամի պաշտոնում առաջարկել է Մարտին Գալստյանի թեկնածությունը:

Թեկնածուին ներկայացրեց ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը: Նա նշեց, որ հիմա ԱԺ-ն իրականացնում է մի պարտականություն, որը նոր է դրված ԱԺ-ի վրա: «ԱԺ նախագահը դիմել է խմբակցություններին, որ այս պաշտոնում առաջարկեն թեկնածուներ, և միայն ՀՀԿ-ն է ներկայացրել թեկնածու, մյուս խմբակցությունները չեն ներկայացրել: Մեր նիստի ժամանակ պատգամավորներից մեկն ասաց` իրենք չեն ստացել ԱԺ նախագահի կողմից առաջարկ: Ես ճշտեցի, այդպիսի առաջարկներ ստացել էին բոլոր խմբակցությունները, սակայն  սահմանված ժամկետում չեն ներկայացրել թեկնածու»,- ասաց նա:

Մինասյանի խոսքով` Գալստյանի թեկնածությունը շատ տպավորիչ է, և նա լուրջ աշխատանքային ճանապարհ է անցել:  «Դիլիջանի դպրոցի առաջին տնօրենն է, իսկ այդ դպրոցը դարձել է բրենդ: Մեր հանձնաժողովը միաձայն կողմ է քվեարկել, որպեսզի նրա թեկնածությունը ներկայացվի ձեր դատին:  Հորդորում եմ` կողմ քվեարկել նրա թեկնածությանը»,- ասաց նա:

Նշենք, որ նախկին կարգը, երբ ԿԲ խորհրդի անդամին նշանակում էր ՀՀ նախագահը, փոխվել է, այժմ խորհրդի անդամներին նշանակում է ԱԺ-ն՝ ֆինանսավարկային հանձնաժողովի առաջարկով։