Արմեն Սարգսյանը ստորագրել է Սևանից ջրառի մասին ԱԺ-ի ընդունած օրենքը

Նախագահ Արմեն Սարգսյանը ստորագրել է Ազգային ժողովի ընդունած «Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների տարեկան ու համալիր ծրագրերը հաստատելու մասին» Հայաստանի Հանրապետության օրենքում լրացումներ կատարելու ՀՀ օրենքը: 

Նշենք, որ օրենքն ընդունվել էր երեկ՝ ձայների 80 կողմ և 1 դեմ հարաբերակցությամբ: 

Հիշեցնենք, որ «S.O.S Սևան» նախաձեռնությունը հայտարարություն էր տարածել, ըստ որի՝  Սևանից ջրառի վերաբերյալ հարցի քննարկման ժամանակ կառավարությունը չանդրադարձավ Սևանա լճի ափամերձ համայնքներին սպառնացող ռիսկերին, որոնք կապված են լճի էկոլոգիական վիճակով պայմանավորված` զբոսաշրջային բիզնեսի անկման և սոցիալական վիճակի վատացման հետ, ինչին ականատես եղանք այս տարի.«Քննարկման ընթացքում նշվեց Սևանա լճի բացասական հաշվեկշռի անթույլատրելիության մասին, սակայն ոչ ոք չասաց, որ Սևանա լիճը 2018-ի հունվարից մինչ օրս ունի բացասական հաշվեկշիռ, ինչը հակասում է «Սևանա լճի մասին» ՀՀ օրենքի և այս օրենքից բխող «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքի պահանջներին: Այս փաստը վկայում է, որ կառավարությունն ընդունեց հակաօրինական որոշում»: