Ուսումնական հաստատություններում այլևս չեն լինելու չհաճախող, բայց դիպլոմ ստացող ուսանողներ ու աշակերտներ. ԿԳ նախարար

Բուհերում, քոլեջներում, ուսումնարաններում և ավագ դպրոցներում այլևս չեն լինելու չհաճախող, բայց դիպլոմ ստացող ուսանողներ ու աշակերտներ։ Այս մասին իր ֆեյսբուքյան էջի ուղիղ եթերում հայտնել է ՀՀ ԿԳ նախարար Արայիկ Հարությունյանը:

Նախարարն անդրադարձել է  խնդրին, որովհետև ուսանողների կողմից ստացված բողոքներ կան, որոնցում նշվում է, որ ավարտական քննության ժամանակ անբավարար գնահատականներ են ստանում: «Մի կողմից ճիշտ է, որ եթե ուսանողը անբավարար է պատասխանում, պետք է անբավարար գնահատական ստանա: Այստեղ երկրորդ կարծիք չի կարող լինել: Բայց սրա հետ մեկտեղ ուսանողները մի խնդիր են առաջ քաշում, որի հարցում նույնպես իրավացի են. ասում են` 4 տարի մեզ հասցրել են վերջին կուրս և հանկարծ խստություն են անում ու դիպլոմ չեն տալիս: Այստեղ հարց է առաջանում, թե ինչպե՞ս են այդ ուսանողները հասել մինչև ավարտական կուրս»,- նշեց նախարարը:

Ըստ նրա` խնդրի լուծումը հաճախումների և ուսումնական հաստատության ղեկավարների գործելաոճի մեջ է: «Մեր ուսումնասիրությունները ցույց են տալիս, որ հատկապես ավագ դպրոցում ու ուսումնարաններում կան չհաճախող ուսանողներ և աշակերտներ: Ստացվում է, որ նրանք չեն հաճախում, պետությունը նրանց յուրաքանչյուրի հաշվով գումար է փոխանցում տվյալ հաստատությանը, ուսումնական հաստատությունների ղեկավարներն այդ աշակերտներին և ուսանողներին պահում են, որովհետև իրենց ուսումնական հաստատությունները դրանից եկամուտ են ստանում, և այսպես արատավոր համաձայնություն է լինում, երբ ուսանողը չի սովորում ու գիտելիք չի ստանում, դրա հետ մեկտեղ պետությունը չմատուցված ծառայությունների դիմաց գումար է տալիս»,- ասաց Արայիկ Հարությունյանը:

ՀՀ կրթության և գիտության նախարարը բոլոր ուսանողներին և աշակերտներին կոչ է անում սեպտեմբերից պարտաճանաչորեն հաճախել ուսումնական հաստատություններ ու սովորել, նաև` զգուշացնում, որ նախարարությունն այս հարցում հետևողական է լինելու: Ավագ դպրոցների և ուսումնարանների ավարտական դասարանի աշակերտներին էլ հորդորում է անհրաժեշտության դեպքում կրկնուսույցների մոտ գնալ դասերից հետո:

«Այլևս նման պրակտիկայի պետք է չգնալ, և սեպտեմբերից հաճախել համալսարան ու սովորել, որովհետև մենք խստագույնս վերահսկելու ենք հաճախումները, հետևաբար` տեսնելու ենք, թե ինչ ծառայություն են մատուցում ուսումնական հաստատությունները, արդյոք արդարացվա՞ծ են տրված այդ ատեստատներն ու դիպլոմները, որոնք տրամադրում են տվյալ ուսումնական հաստատությունները: Ավագ դպրոցի` հատկապես վերջին տարում աշակերտները չեն հաճախում` համաձայնության գալով իրենց տնօրենների հետ, որպեսզի պարապեն այդ ընթացքում կրկնուսույցի մոտ: Կարծում եմ, որ պատշաճ կերպով դասերի հաճախելը դպրոցում և սովորելը թույլ կտան լավ արդյունքներ գրանցել ավարտական և ընդունելության քննությունների ժամանակ»,- նշեց Հարությունյանը:

Կրթության և գիտության նախարարը ֆեյսբուքյան ուղիղ եթերի վերջում խոստացավ հաջորդ անգամ խոսել Երևանի չինական դպրոցի մասին: