Կառավարությունը տեղեկատվություն է հավաքագրում՝ Սփյուռքի մասնագետներին ներգրավելու նպատակով

ՀՀ կառավարման ոլորտում համահայկական մասնագիտական ներուժի ներգրավման անհրաժեշտությունից ելնելով՝ վարչապետի հանձնարարությամբ սփյուռքի նախարարությունը մյուս գերատեսչություններից տեղեկատվություն է հավաքագրում՝ համապատասխան ոլորտներում այս պահին պահանջվող մասնագետների վերաբերյալ: Մոտ ժամանակներս վերոնշյալ ցանկը կհրապարակվի:

Սակայն կարևոր եմ համարում ընդգծել, որ այս համատեքստում սփյուռքի ներգրավման հետ կապված մեկ այլ խնդիր է առկա: Այսօր ՀՀ առանձին օրենքներ (Հանրային ծառայության մասին, Քաղաքացիական ծառայության մասին և այլ օրենքներ), ըստ էության, խոչընդոտում են սփյուռքի ներուժի լայն ընդգրկումը պետական կառավարման համակարգում: Եվ հատկապես այս նոր իրավիճակում մենք պետք է լրջորեն մտածենք այդ խնդրի մասին, որն օրենսդրական դաշտում է և մեկ օրում չի լուծվի: Բայց պետք է հնարավորինս արագ աշխատենք սույն խնդրի լուծման ուղղությամբ, և արդեն սփյուռքի նախարարության կողմից մշակվում է մի քանի առաջարկներից բաղկացած փաթեթ: Մեր նպատակն է խնդրի լուծման հնարավոր օպտիմալ և այլընտրանքային տարբերակներ գտնելը»: