Արարատի մարզում երկու քաղաքացի ինքնակամ զենք են ներկայացրել ոստիկանություն

Ոստիկանությունը շարունակում է ապօրինի պահվող զենք-զինամթերք հայտնաբերելու գործընթացը՝ շեշտը դնելով քարոզչության վրա։ Այս ուղղությամբ տարված բացատրական աշխատանքի արդյունքում, ոստիկանության Արարատի մարզային վարչության ենթակա ստորաբաժանումներում հունիսի 28-ին և 29-ին արձանագրվեցին զենք-զինամթերք ինքնակամ հանձնելու դեպքեր։

Հունիսի 28-ին ոստիկանության Արտաշատի բաժին դիմած քաղաքացին իրավապահներին ներկայացրեց 9 մմ տրամաչափի 48 փամփուշտ, առանց պայթուցիչի Ֆ-1 նռնակ, նռնակի 2 պայթուցիչ, ատրճանակի պահունակ՝ լիցքավորված 8 փամփուշտով և 5,45մմ տրամաչափի 21 փամփուշտով լիցքավորված ինքնաձիգի պահունակ։ Հայտնեց, որ ներկայացրածը պատկանել է հանգուցյալ հորը, որն այն ձեռք է բերել Արցախյան ազատամարտի տարիներին։

Հաջորդ օրը, մի կին ինքնակամ զենք-զինամթերք ներկայացրեց ոստիկանության Արարատի բաժանմունք։ Ներկայացվածը 9 մմ տրամաչափի փամփուշտ կրակելու համար նախատեսված ինքնաշեն հրազեն էր, 2 Ֆ-1 նռնակ՝ պայթուցիչներով և 5,45 մմ տրամափի 95 փամփուշտ։ Հայտնեց, որ զենքն ու զինամթերքը պատկանել են հանգուցյալ ամուսնուն։

Ներկայացվածն ուղարկվել է դատաձգաբանական փորձաքննության։
Ոստիկանությունը կրկին հորդորում է ինքնակամ ներկայացնել ապօրինի պահվող զենք-զինամթերքը, քանի որ այդ դեպքում անձն ազատվում է ապօրինի պահելու համար նախատեսված քրեական պատժից։