ՊԵԿ նախագահը չցանկացավ անուններով կամ մականուններով խոսել

Կառավարության նիստից հետո լրագրողների հետ ճեպազրույցում ՊԵԿ նորանշանակ նախագահ Դավիթ Անանյանն անդրադարձավ ստվերի դեմ պայքարին: Նա կարծիք հայտնեց, որ ստվերի դեմ արդյունավետ պայքար է տարվելու, և նոր քաղաքական իրողություններում ավելի հիմնավոր պայմաններ են ստեղծված այդ պայքարն ավելի արդյունավետ տանելու ուղղությամբ: Անանյանը նշեց, որ բյուջեի եկամուտների հավաքագրումը կլինի նախատեսվածից ավելի:

Լրագրողները պահանջեցին ստվերում գործող տնտեսվարողների անուններ հնչեցնել: ՊԵկ նախագահը նշեց, որ իր պաշտոնավարման վեցերորդ օրն է, և անուններ հնչեցնելը ճիշտ չէ, իսկ տեղեկատվություն ներկայացնելիս ՊԵԿ-ը կներկայացնի տնտեսվարողի հաշվառման համարով, այլ ոչ` անունները կամ մականունները: «Ես խոստանում եմ, որ պաշտոնավարման 100-րդ օրը մենք ավելի հիմնավոր կներկայացնենք տեղեկատվություն այդ խնդիրների վերաբերյալ»,- խոստացավ նա:

ՊԵԿ նախագահի խոսքով` իրենց նպատակը համակարգային դրական տեղաշարժերն են, և մաքսակետերում դրական տեղաշարժերով չեն սահմանափակվելու: «ՊԵԿ-ը գործելու է օրենսդրության շրջանակներում, չպետք է լինեն ավելի գերադասված տնտեսվարողներ»,- ասաց Դավիթ Անանյանը: