Ռոբերտ Քոչարյանի վերադարձի հետ կապված խոսակցություններն անլուրջ են. Նիկոլ Փաշինյան

Ռոբերտ Քոչարյանի վերադարձի հետ կապված խոսակցությունները «Իմ քայլը»  շարժման առաջնորդ Նիկոլ Փաշինյանը համարում է անլուրջ: «Մարիոթ»-ում հրավիրված ասուլիսի ժամանակ այսպես նա անդրադարձավ խոսակցություններին, թե հնարավոր է ՀՀ երկրորդ նախագահ Ռոբերտ Քոչարյանը վերադառնա քաղաքականություն:

Ինչ վերաբերում է  Կարեն Կարապետյանի` Հայաստանում բնակվելու ցենզին, Փաշինյանը նշեց, որ տվյալներին չի տիրապետում, և այդ հարցով պետք է զբաղվեն համապատասխան կազմակերպությունները։

Փաշինյանն ընդգծեց, որ եթե ՀՀԿ-ն չզիջի դիրքերը, ճգնաժամն ավելի կխորանա, իսկ իրենք թույլ չեն տա խլել ժողովրդի հաղթանակը:

Անդրադառնալով երեկ Հանրապետության հրապարակում հնչեցրած իր այն հայտարարությանը, թե կա'մ ինքը կլինի վարչապետ, կա'մ վարչապետ չի լինի, նա ասաց, որ  նկատի է ունեցել, որ կա'մ երկրում քաղաքական ճգնաժամը կլուծվի, կա'մ կխորանա: «Հարցն այն չէ, թե ով կլինի վարչապետ, այլ այն, որ ճգնաժամը կարգավորվի։ Համոզված ենք, որ քաղաքացիների զարթոնք է եղել, և մենք կդավաճանենք շարժմանը, եթե ամեն հնարավորություն չօգտագործենք` արդյունքները դե յուրե ամրագրելու համար»,–ասաց Փաշինյանը։