ԱԺ-ում քննարկվել է համաձայնագիր, որը հնարավորություն կտա ամրապնդել Երեւանի եւ Բրյուսելի միջեւ քաղաքական երկխոսությունը

ՀՀ Ազգային ժողովի եվրոպական ինտեգրման հարցերի եւ ՀՀ ԱԺ արտաքին հարաբերությունների մշտական հանձնաժողովների համատեղ նիստում Նաիրա Զոհրաբյանի եւ Արմեն Աշոտյանի նախագահությամբ ապրիլի 9-ին քննարկվել է «Հայաստանի Հանրապետության` մի կողմից, Եվրոպական միության եւ ատոմային էներգիայի եվրոպական համայնքի ու դրանց անդամ պետությունների` մյուս կողմից, միջեւ համապարփակ եւ ընդլայնված գործընկերության» համաձայնագիրը վավերացնելու մասին» ՀՀ օրենքի նախագիծը, որը հանձնաժողովների դրական եզրակացությամբ կընդգրկվի ՀՀ ԱԺ վեցերորդ գումարման երրորդ նստաշրջանի օրակարգի նախագծում: Քննարկմանը ներկա էր նաեւ Հայաստանում ԵՄ պատվիրակության ղեկավար, դեսպան Պյոտր Սվիտալսկին:

Հիմնական զեկուցող, ՀՀ արտաքին գործերի նախարարի տեղակալ Կարեն Նազարյանն ընդհանուր գծերով ներկայացրել է համաձայնագիրը՝ նշելով, որ դրա շուրջ ընթացող բանակցային գործընթացն ավարտվել է ընթացիկ տարվա փետրվարին, որից հետո կողմերն անցել են փաստաթղթի իրավական զննմանը: Հրապարակվել են դրա հայերեն եւ անգլերեն տարբերակները:

Փոխնախարարն անդրադարձել է համաձայնագրի ստորագրման գործընթացին՝ նշելով, որ գործել են երկու աշխատանքային խմբեր, որոնք զբաղվել են փաստաթղթի քաղաքական եւ տնտեսական մասերով:

386 հոդվածից եւ 3000 էջից բաղկացած համաձայնագիրը պետք է վավերացնի ԵՄ անդամ 28 երկիր. առայժմ վավերացրել է մեկը: Այն արդեն հավանության են արժանացրել ՀՀ սահմանադրական դատարանը եւ ՀՀ կառավարությունը: Կարեն Նազարյանի խոսքով՝ համաձայնագիրն ընդգրկուն է, այն հնարավորություն է տալու ամրապնդել Երեւանի եւ Բրյուսելի միջեւ քաղաքական երկխոսությունը, ամուր հիմք է ստեղծելու տնտեսական ու սոցիալական բարեփոխումները շարունակելու համար: Համաձայնագրով նաեւ կաշխուժանա էներգետիկայի, տրանսպորտի, շրջակա միջավայրի պաշտպանության ոլորտներում համագործակցությունը, կմեծանա ՀՀ քաղաքացիների շարժունակությունը: Այն նաեւ կնպաստի առեւտրատնտեսական կապերի ամրապնդմանը եւ ներդրումների խրախուսմանը:

Հարակից ելույթներ են ունեցել հանձնաժողովների նախագահներ Արմեն Աշոտյանը եւ Նաիրա Զոհրաբյանը:

Պատմական գնահատելով համաձայնագրի ստորագրումը՝ արտաքին հարաբերությունների մշտական հանձնաժողովի նախագահն այն համարել է մեր երկրի արտաքին քաղաքականության հաջողված պատմություններից մեկը: Արմեն Աշոտյանը հույս է հայտնել, որ ԵՄ անդամ երկրները հնարավորինս արագ կվավերացնեն համաձայնագիրը: Նա առանձնապես կարեւորել է խորհրդարանական վերահսկողության ուժեղացումը ոլորտներում, ինչպես նաեւ ԵՄ անդամ երկրների հետ խորհրդարանական համագործակցությունը նոր ձեւաչափով, որը նախատեսվում է այս համաձայնագրով: Կարեւորվել է հանրության իրազեկումն ու քաղաքացիական ուժերի ներգրավումն այս գործընթացներում:

Նաիրա Զոհրաբյանը եւս կարեւորել է համաձայնագրի ստորագրումը եւ անհրաժեշտ համարել ՀՀ օրենսդրության համապատասխանեցման գործընթացը ԵՄ օրենսդրությանը՝ հույս հայտնելով, որ շուտով կսկսվի նաեւ վիզաների ազատականացման գործընթացը: Նա նույնպես կարեւորել է խորհրդարանական համագործակցության նոր ձեւաչափով աշխատելու հնարավորությունը եւ գոհունակությամբ փաստել, որ համաձայնագիրն այն եզակի փաստաթղթերից է, որի վերաբերյալ համակարծիք են հայաստանյան գրեթե բոլոր քաղաքական ուժերը:

Համաձայնագրի վերաբերյալ իրենց դրական տեսակետներն են հայտնել եւ առաջարկներ ներկայացրել ՀՀ ԱԺ պատգամավորներ Կարեն Բեքարյանը, Սամվել Ֆարմանյանը, Արմեն Ռուստամյանը եւ Միհրան Հակոբյանը: