Ալբերտ Դալլաքյանին Գերմանիայում վիրահատել են. նրան սպասվում է ևս մեկ վիրահատություն

2016թ. հունիսի 24-ին դասակի հրամանատարի կողմից զենքի հետ վարվելու կանոնները խախտելու հետևանքով վիրավորված զինծառայող Ալբերտ Դալլաքյանին Գերմանիայում մարտի 7-ին վիրահատել են: Այս մասին տեղեկանում ենք Թագուհի Օհանյանի ֆեյսբուքյան էջից /նա ուղեկցում է Ալբերտին/:

Զինծառայողի վիրահատությունը տևել է 6 ժամ 45 րոպե և բարեհաջող ավարտվել: Ալբերտ Դալլաքյանն իրեն շատ լավ է զգում, արդեն քայլում է: Զինծառայողին սպասվում է ևս մեկ վիրահատություն, որը կտևի 4-6 ժամ:

Հիշեցնենք, որ ՀՀ պաշտպանության նախարար Վիգեն Սարգսյանը ֆեյբուքյան գրառմամբ նախաձեռնել էր հանգանակություն՝ Դալլաքյանի բուժումը դրսում կազմակերպելու համար: «Ես անձամբ և իմ մի քանի ընկեր կտրամադրենք պահանջվող գումարի ($45.000) 10 տոկոսը: Կոչ եմ անում բոլորիդ, ով կարող է միանանք այս դրամահավաքին և օր առաջ օգնենք Ալբերտի ընտանիքին հավաքել անհրաժեշտ գումարը: Նույնիսկ պարզապես այս կոչիս տարածումը ձեր կողմից ևս կարող է օգնել: Աստված պահապան Ալբերտին, մեր բոլոր հերոսներին, բանակին և ժողովրդին»,- գրել էր նախարարը: