ՀՀԿ-ն կողմ քվեարկեց «Ելք»-ի` «Մարտի 1-2 իրադարձությունների վերաբերյալ» ԱԺ հայտարարության նախագիծը նիստի օրակարգում ընդգրկելու հարցին

ԱԺ-ն քննարկեց «Ելք» խմբակցության` «2008 թվականի մարտի 1-2 իրադարձությունների վերաբերյալ» ԱԺ հայտարարության նախագիծը ԱԺ նիստերի օրակարգում ընդգրկելու հարցը: Ելույթով հանդես եկավ «Ելք» խմբակցության ղեկավար Նիկոլ Փաշինյանը և նշեց, որ Մարտի 1-ի իրադարձությունների էջը դեռ փակված չէ և չի փակվելու, քանի դեռ բոլոր սպանությունները բացահայտված չեն։

ՀՀ պետաիրավական հանձնաժողովի փոխնախագահ Ռուստամ Մախմուդյանն իր խոսքում նշեց, որ ՀՀԿ-ն սկզբունքորեն դեմ չէր լսումներ անցկացնելուն, և լսումների ժամանակ դատախազության ներկայացուցչի զեկույցից պարզ էր՝ կատարվում է ամեն ինչ` այդ մեղավորներին բացահայտելու համար։ Մախմուդյանը նաև նշեց, որ ԱԺ ժամանակավոր հանձնաժողովն արդեն հիմնավորումներ է տվել, թե ինչու է բացասական եզրակացություն տվել նախագծին։ Հանձնաժողովի անդամ Գևորգ Կոստանյանն առաջարկել է նախագիծը մտցնել նիստերի օրակարգ և քննարկել հարցը:

«Ելք» խմբակցության պատգամավոր Էդմոն Մարուքյանն էլ նշեց, որ լսումների ժամանակ բոլոր հանրապետականները ափսոսանքի խոսք էին ասում և ցավակցում զոհերի հարազատներին, հիմա ինչո՞ւ են դեմ:

ՀՀԿ խմբակցության ղեկավար Վահրամ Բաղդասարյանը պատասխանեց, որ իրենց տեղը որոշում կայացնել պետք չէ, իրենք չեն ասել, թե դեմ են: «Կոչ եմ անում կողմ քվեարկել նախագիծն օրակարգում ընդգրկելու հարցին՝ այն քննարկման առարկա դարձնելու համար: ՀՀԿ-ն կողմ կքվեարկի»,- հայտարարեց նա:

Նախագիծը նիստերի օրակարգում ընդգրկելու հարցին խորհրդարանական բոլոր ուժերը կողմ քվեարկեցին։

«Կարծում եմ` ընդդիմությունը կգնահատի իշխանության այս քայլը»,- նշեց ԱԺ փոխնախագահ Էդուարդ Շարմազանովը։