Թուրքիայի կողմից օկուպացիան հանգեցնում է անմեղ կանանց եւ երեխաների մահվան

Կանադայի Հայ Դատի հանձնախումբը փետրվարի 7-ին նամակ է հղել Կանադայի արտգործնախարար Քրիստիա Ֆրիլանդին՝ տեղեկացնելով, որ Աֆրինի նկատմամբ թուրքական բանակի կողմից կիրառվող զինված գործողությունները անօրինական են:

«Ներկա իրավիճակը լուրջ սպառնալիք է Սիրիայի քաղաքացիական պատերազմի խաղաղ լուծմանը»,- ասվում է նամակում:

Կանադայի Հայ դատի հանձնախումբը հայտարարել է, որ Թուրքիայի կողմից օկուպացիան հանգեցնում է անմեղ կանանց եւ երեխաների մահվան:

Ընդգծելով, որ Աֆրինը Սիրիայի առավել խաղաղ եւ անվտանգ շրջաններից է, հանձնախումբը հիշեցնում է, որ այն սիրիացի ներգաղթյալների համար ապաստան է: Նամակում նաև նշված է. «Այսօր Աֆրինը շրջապատված է ուժերով, որոնք չեն ուզում այս տարածաշրջանի զարգացումը»:

«Մենք վստահ ենք, որ Կանադան եւ միջազգային հանրությունը քուրդ ժողովրդին աջակցություն ցուցաբերելու բարոյական պարտականություն են կրում»,- կոչ է արել Կանադայի Հայ Դատի հանձնախումբը` խստորեն դատապարտելով հարձակումը, և խնդրել, որ ԱԳՆ-ն ևս օգնի կասեցնել Թուրքիայի ապօրինի գործողություններն ու վերջինիս զինված ուժերը անհապաղ դուրս բերելու պահանջ ներկայացնի:

noranor.ca