Հովիկ Աբրահամյանին կարող ենք գիդ նշանակել «Հաղթանակ» զբոսայգում. Նիկոլ Փաշինյան

ԱԺ-ում լրագրողների հետ ճեպազրույցների ժամին «Ելք» խմբակցության ղեկավար Նիկոլ Փաշինյանն անդրադարձավ Մոնումենտի շքեղ առանձնատներին և հարցին` արդյո՞ք նա այդտեղ կոռուպցիոն ռիսկեր է տեսնում:

«Ասում են, չէ՞, որ Հայաստանը թանգարան է բաց երկնքի տակ: Հիմա «Հաղթանակ» զբոսայգին և դրա հարակից տարածքները թանգարան են բաց երկնքի տակ»,- ասաց նա:

Պատգամավորը կատակեց` ասելով, որ սա շատ կարևոր է տուրիզմի զարգացման համար: «Մենք կարող ենք լինել առաջին պետությունը, որ պաշտոնապես կոռուպցիայի թանգարան ունի բաց երկնքի տակ: Հաշվի առնելով, որ Հովիկ Աբրահամյանը զբաղվածության խնդիր ունի, կարող ենք այդտեղ գիդ նշանակել»,- ասաց նա: