Ես ադրբեջանական սադրանքներին չեմ տրվել, ուր մնաց հայրենակցիս սադրանքներին տրվեմ. Աշոտյանը` Փաշինյանին

Ազգային ժողովի արտաքին հարաբերությունների հանձնաժողովի նախագահ Արմեն Աշոտյանը հանձնաժողովի նիստում հետաքրքրվեց «Ելք» խմբակցության ղեկավար Նիկոլ Փաշինյանից, թե ինչո՞վ նրանց չի  բավարարում մշտական հանձնաժողովների ձևաչափը, որ կարծում են` ժամանակավոր հանձնաժողով պիտի ստեղծվի՝ քննարկելու ԵԱՏՄ-ից դուրս գալու հարցը:

Նիկոլ Փաշինյանը պատասխանեց, որ խորհրդարանի կանոնակարգ-օրենքը դա թույլ է տալիս, ապա նշեց, որ առանձին օրենքների, նախագծերի, ուղերձների, պատգամավորների էթիկայի վերաբերյալ առանձին հանձնաժողովներ կարող են լինել: Նա նշեց, որ իրենց չի բավարարում մշտական հանձնաժողովի կողմից տրվող եզրակացությունը:

Արմեն Աշոտյանը հետաքրքրվեց` ի՞նչ լիազորություն ունի ժամանակավոր հանձնաժողովը, որը չունի մշտականը:

Փաշինյանը պատասխանեց, որ ԱԺ մշտական հանձնաժողովը կարճաժամկետ է քննարկում հարցը, իսկ ժամանակավոր հանձնաժողովն ավելի երկար ժամանակ է տրամադրում հարցի քննարկմանը, կարող է նախագահ Սերժ Սարգսյանին հրավիրել խորհրդարան:

«Ի՞նչ կա, պարզ, պրիմիտիվ գրված է: Ես ձեզ խորհուրդ եմ տալիս ուսումնասիրել կանոնակարգը, ավելի ուշադիր կարդացեք, որ անպատեհ հարցեր չտաք: Ճիշտ է՝ նոր եք եկել խորհրդարան, բայց հանձնաժողովի նախագահի պաշտոնում պիտի տիրապետեք կանոնակարգին ու դրա նրբություններին»,- ասաց պատգամավորը:

Աշոտյանն էլ արձագանքեց, թե իր անմեղ հարցը հունից հանեց Փաշինյանին, ապա կոռեկտության սահմաններ վերադառնալու կոչ արեց: «Ավելի լավ կլիներ, որ ընտրարաշավի ժամանակ ներկայացնեիք, որ նման նախաձեռնություն եք անելու, և բարձրաձայնեիք «Քաղպայմանագիր», «Լուսավոր Հայաստան» և «Հանրապետություն» կուսակցությունների միջև եղած հարցերը»,- ասաց նա:

Փաշինյանն արձագանքեց, որ իրենց նախընտրական ծրագրում գրված է, որ քաղաքական կոպիտ սխալ է ՀՀ-ի անդամակցությունը ԵՏՄ-ին: Իսկ երբ ժամանակը լրանալուց հետո շարունակում էր խոսել, Աշոտյանն ասաց. «Ես ադրբեջանական սադրանքներին չեմ տրվել, ինչ մնաց` հայրենակցիս սադրանքներին տրվեմ»:

«Տպավորվել եք, զգույշ, տպավորության տակ չմնաք»,- ասաց Փաշինյանը: Աշոտյանն էլ պատասխանեց. «Ձեր ֆրակցիայից մարդ կար, հանգիստ եղեք»: