Իսրայելը, լինելով «օկուպացնող» պետություն, հազիվ թե իրեն երկակի բարոյականություն թույլ տա. Լապշին

Բլոգեր Ալեքսանդր Լապշինն իր ֆեյսբուքյան էջում հերթական ուշագրավ գրառումն է կատարել:

«Վերջին օրերին իսրայելցի շատ հասարակական գործիչներ եւ առանձին դիվանագետներ ինձ բուռն քննադատում էին՝ ասելով, թե  այդ բլոգերի պատճառով չի կարելի Ադրբեջանի հետ հրաշալի հարաբերությունները հարցականի տակ դնել: Խախտել ես Ադրբեջանի օրենքները և այցելել Ղարաբաղ` ազերական բանտում նստիր: Այսպիսի վարկածի մասին է խոսել, օրինակ,  Մինսկում Իսրայելի նախկին հարգարժան դեսպան Յոսեֆ Շագալը:

Շագալն անձամբ շատ բան է արել իմ ազատագրման համար, ինչի համար շնորհակալ եմ նրան: Այնուամենայնիվ, Իսրայելն ինքը, լինելով «օկուպացնող» պետություն, հազիվ թե իրեն թույլ տա նման երկակի բարոյականություն: Արդյո՞ք ինձ քննադատողները տեղյակ են, որ 1967 թվականին Սիրիայից գրավված Գոլանի բարձունքներ այցելությունը Սիրիայի օկուպացված տարածքների մասին օրենքի խախտում է: Սիրիացիներն օրինական իրավունք և  ռեսուրս ունեն Ինտերպոլի միջոցով հետախուզում հայտարարելու Գոլանի բարձունքներ այցելած ցանկացածի, այդ թվում՝ նախկին դեսպանների նկատմամբ:

Առավել  ևս, որ Ադրբեջանը ցույց է տվել, որ սարսափելի ոչինչ չի լինի. լրագրողները կաղմկեն և կմոռանան»,- գրել է Լապշինը: