Իսրայելը պետական մակարդակով ոչինչ չի ձեռնարկել ինձ փրկելու համար. Լապշին

Իսրայելը պետական մակարդակով բացարձակապես ոչինչ չի ձեռնարկել ինձ փրկելու համար` ո'չ բելառուսական բանտում գտնվելու ժամանակ, ո'չ ադրբեջանական: Այդ մասին իր բլոգում գրել է Ալեքսանդր Լապշինը:

Ըստ նրա` Ադրբեջանն այս տարի Իսրայելի հետ մոտ 5 միլիարդ դոլարի սպառազինության մատակարարման մասին պայմանագրեր է կնքել, ավելին` Ադրբեջանը մինչ այժմ չի մարել նախկինում մատակարարված սպառազինության պարտքը՝ նավթի գների անկման պատճառով:

Լապշինի կարծիքով` եթե տեղի ունենար իր արտահանձնումը, Իսրայելը դժվար դրության մեջ կհայտնվեր: Իսրայելական դատարանը պետք է արդարացներ իրեն՝ մեղմ ասած, ոչ ադեկվատ ճանաչելով ադրբեջանական դատավճիռը:

Նա գրում է, որ  նման մասշտաբային ռազմական պայմանագրեր ստանալը հեշտ չէ, իսկ կորցնել դրանք կարելի է մեկ վայրկյանում՝ օրինակ, պաշտպանելով ադրբեջանական բանտում անօրինական կերպով հայտնված բլոգերի:

«Ի՞նչ է որոշել անել Իսրայելն այդ իրավիճակում: Բացարձակապես ոչինչ»,- գրում է Լապշինը:

Լապշինը նշում է, որ կար հանգամանք, որը ձեռնտու էր Իսրայելին`  Ադրբեջանը ցանկանում էր ազատվել իրենից: Ըստ նրա` Ադրբեջանում վստահ էին, որ հենց լինի դատավճիռը, նրանք իրեն անմիջապես կուղարկեն իր քաղաքացիության երկրներից մեկը (Իսրայել կամ Ռուսաստան), բայց դրա փոխարեն ինքը շարունակում էր մնալ բանտում և նրանց համար գլխացավանք ստեղծել: Լապշինի խոսքով` իրեն կալանավայր ուղարկել, որտեղ հազարավոր կալանավորներ կան, նրանք նույնպես չէին կարող, քանի որ այնտեղ իրեն պարզապես կսպանեին գործի առանձնահատկությունների պատճառով: Արդյունքում` Բաքվում որոշել են բեմադրել իր ինքնասպանությունը, այնուհետև, իբր խղճալով, ներում շնորհել:

Վերջում Լապշինը շնորհակալություն է հայտնում իրեն օգնած առանձին մարդկանց` Կնեսետի պատգամավորների, հանրային գործիչների, լրագրողների:

 Ըստ նրա` Իսրայել պետությունը վաճառեց իրեն պաշտպանական պայմանագրի դիմաց: