Էրդողանը կենտրոնացել է ԱՊՀ-ի վրա. Газета.ру

Թուրքիայի նախագահ Ռեջեփ Թայիփ Էրդողանը սեպտեմբերի 8-10-ն ընկած ժամանակահատվածում կայցելի Աստանա, որտեղ կհանդիպի Ղազախստանի նախագահ Նուրսուլթան Նազարբաևի հետ: Դրանից հետո Թուրքիայի ղեկավարը կուղևորվի Ադրբեջան. գրում է Газета.ру-ն:

Թերթը նշում է, որ այցերի այդ աշխարհագրությունը համընկել է Եվրամիության հետ Թուրքիայի հարաբերությունների վատթարացման հետ:

«ԵՄ-ին Թուրքիայի անդամակցության հեռանկարն ավելի ու ավելի անիրական է դառնում, ինչն Էրդողանին դրդում է այլ դաշինքներում քաղաքական դաշնակիցներ փնտրել»,- գրում է թերթը:

Ըստ թերթի` Ղազախստանում հանդիպման վերաբերյալ հաղորդագրությունում ընդգծվում է Էրդողանի այցի բարեկամական բնույթը:

«Իսկապես, երկրների միջև հարաբերությունները զգալիորեն ամրապնդվել են վերջին տարիներին: Հենց Ղազախստանն է միջնորդ հանդիսացել Ռուսաստանի և Թուրքիայի միջև հարաբերությունների կարգավորման հարցում»,- գրում է թերթը, նաև` հիշեցնում, որ մեկ ամիս առաջ Էրդողանն անգամ հայտարարել է, որ իր երկրին այլևս չի հետքրքրում ԵՄ-ին անդամակցությունը: