Հայ-իսրայելական հարաբերություններին անօդաչու է հարվածել. Коммерсантъ

Իսրայելի պաշտպանության նախարարությունը հետաքննություն է իրականացնում հարվածային անօդաչու թռչող սարքեր արտադրող Aeronautics Defense Systems (ADS) ընկերության նկատմամբ: Ինչպես ավելի վաղ հայտնել էր իսրայելական «Մաարիվ» թերթը, Թել Ավիվում գտնվող ընկերության աշխատակիցները հնարավոր է Ադրբեջան այցի ժամանակ ադրբեջանցի զինվորականների խնդրանքով մասնակցել են Լեռնային Ղարաբաղում հայկական դիրքերի ուղղությամբ իրականացված հարվածին: Ընկերությունը բոլոր մեղադրանքները վճռականորեն հերքում է, սակայն Բաքվի հետ նրա համագործակցության մասին վաղուց է հայտնի. գրում է Коммерсантъ-ը:

Թերթը հիշեցնում է, որ, հրապարակման համաձայն, Aeronautics Defense Systems-ի աշխատակիցները մեկնել են Ադրբեջան՝ ընկերության Orbiter 1K անօդաչուի վաճառքի վերաբերյալ պայմանագրի կնքման համար, նրանց խնդրել են ցուցադրել տեխնիկայի հնարավորությունները և կիրառել այն հայկական դիրքերի ուղղությամբ:

«Սակայն իսրայելցի օպերատորները հրաժարվել են անել դա: Ընկերության մենեջերները մեղադրել են նրանց պայմանագրի կնքումը ձախողելու մեջ, և արդյունքում` հենց նրանք  են ղեկավարել անօդաչու սարքերը»,- գրում է թերթը:

Իսրայելի ռազմական գերատեսչության մամուլի ծառայությունը,  իրավիճակը մեկնաբանելու վերաբերյալ թերթի խնդրանքին ի պատասխան, հայտարարել է. «Պաշտպանության նախարարությունը սովորաբար չի մեկնաբանում ռազմական արտահանման հետ կապված տեղեկությունները: Այդ հարցը գտնվում է պաշտպանության նախարարության համապատասխան բաժինների ստուգման փուլում»:

Իսրայելի պետական կառույցներում Коммерсантъ-ի աղբյուրը «Մաարիվ» թերթում հրապարակվածը «արտառոց» է անվանել: «Նման բան նախկինում չի եղել: Բայց եթե դա, այնուամենայնիվ, ճիշտ լինի, ռազմական գերատեսչությունը, իհարկե, պատժամիջոցներ կկիրառի ընկերության նկատմամբ»,- ասել  նա:

 Թերթը նաև հիշեցնում է, որ անցած տարվա դեկտեմբերին Ադրբեջանի նախագահ Իլհամ Ալիևը հայտնել էր, որ Իսրայելը և Ադրբեջանը ռազմարդյունաբերական ոլորտում համագործակցության ընթացքում կնքել են մոտ 5 միլիարդ դոլարի պայմանագրեր: